САД, Јужна Кореја и Јапонија ќе воспостават поблиска соработка на полето на безбедноста на првиот ваков самит во близина на Вашингтон, од кој ќе испратат порака за единство до Кина, но и до Северна Кореја. Средбата ќе се одржи денеска.

Јужнокорејската агенција Јонхап пишува дека Пјонгјанг за време на состанокот би можел да лансира балистичка ракета за тројцата лидери „да не ја заборават“.

Џо Бајден одлучи да ги прими јапонскиот премиер Фуми Кишида и јужнокорејскиот претседател Јун Сук-Јол во Кемп Дејвид, летната резиденција на американските претседатели, чие име се поврзува со мировните преговори на Блискиот Исток.

„Тоа на значаен начин ја покажува важноста што му ја придаваме на овој голем настан“, коментираше Курт Кембел, главен советник на американскиот претседател за Азија, во средата на тркалезната маса организирана од Институтот Брукингс.

Тој рече дека на самитот, прв од ваков вид по неколкуте средби на тројцата лидери на маргините на големите меѓународни собири, треба да бидат објавени две информации.

Прво, САД, Јапонија и Јужна Кореја ќе се обврзат да одржуваат таков состанок секоја година. Второ, трите земји ќе воспостават „итен канал за комуникација меѓу шефовите на држави и влади и другите функционери на нивните администрации“.

Тоа ќе биде еден вид „црвен телефон“ со три слушалки, на крајот на светот кој живее под заканата од нуклеарната програма на Северна Кореја и стравувањата од кинеска инвазија на Тајван.

„Го направивме токму она што Кина воопшто не го сакаше“, рече американскиот амбасадор во Јапонија Рам Емануел на дискусијата на тркалезната маса во средата.