Синоќа се одржа 78. доделување на филмските награди на Британската академија за филм и телевизија – БАФТА.  На церемонијата, чиј домаќин беше шкотскиот актер Дејвид Тенант, триумфираа филмoвите „Конклава“  и „Бруталистот“.

Филмот „Конклава“ имаше најмногу номинации во пресрет на церемонијата, дури 12. По него следуваа „Емилија Перез“ со 11 номинации и „Бруталистот“ со 9 номинации.

Вечерта за филмската екипа на „Конклава“ заврши со вкупно четири награди, меѓу кои, за главната категорија – најдобар филм, а исто толку награди доби и филмот „Бруталистот“.

Најголемото изненадување на вечерта беше победата на Мајки Медисон во категоријата за најдобра женска улога во филмот „Анора“.

Во сценариото повторено од Златните глобуси, Адриен Броди беше награден за најдобра главна машка улога за филмот „Бруталистот“. Во категориите најдобри споредни улоги, наградени беа Зои Салдана за улогата во филмот „Емилија Перез“ и Киеран Калкин за филмот „Вистинска болка“.

Исто така, Брејди Корбет победи во категоријата за најдобар режисер благодарение на филмот „Бруталистот“.

Актерот и режисер Џеси Ајзенберг, ја доби наградата за најдобро оригинално сценарио за филмот „Вистинска болка“.

За извонредно дебитантско дело на британски автори, наградата му припадна на Рич Пепиат за филмот „Никеп“, кој исто така освои награда на минатогодишниот фестивал „Санденс“. Тоа е и најуспешниот дебитантски филм во историјата на наградата со шест номинации. Наградата за ѕвезда во подем која ја додели публиката му припадна на актерот Дејвид Џонсон.

Принцот Вилијам и принцезата Кејт Мидлтон ја пропуштија церемонијата на доделување награди оваа година, а меѓу забележителните отсуства на доделување на наградите беше она на актерката Карла Софија Гаскон, која влезе во историјата како првата транс жена номинирана за најдобра главна женска улога.

Последните недели таа беше мета на бројни критики откако се појавија нејзините стари објави со несоодветна содржина, па наиде на осуда од дел од филмските ентузијасти, кои дури побараа отстранување од трката за Оскар. Но, режисерот Жак Одиар ја поддржа во неговиот говор откако на филмот „Емилија Перез“ му беше доделена наградата за најдобар странски филм.

Победниците во сите категории можете да ги прочитате тука.