Австралискиот медиум „Еј-Би-Си“ ги затвора речиси сите свои официјални профили на Твитер – сега познати како Икс под сопственост на Илон Маск – како причина наведувајќи ги „токсичните содржини“, трошоците и подобрата интеракција на другите платформи на социјалните мрежи.

Ќе има само четири преостанати официјални профили за австралискиот јавен радиодифузер: @abcnews, @abcsport, @abcchinese и главниот профил @abcaustralia.

„Почнувајќи од денес, другите сметки на Еј-Би-Си ќе бидат прекинати“, изјави извршниот директор на радиодифузерот, Дејвид Андерсон.

Андерсон рече дека затворањето на профилите Insiders, News Breakfast и ABC Politics ја ограничила количината на токсични интеракции, кои станале поприсутни откако Маск го купил Твитер.

Неколку новинари од „Еј-Би-Си“ го напуштиле Твитер откако биле изложени на злоупотреба, вклучително и водителката на утринската програма Лиза Милар, како и водителката на емисијата Австралија Стори, Ли Салес.

„Исто така, откривме дека затворањето на поединечни профили помага да се ограничи изложеноста на членовите на тимот на токсичните интеракции кои за жал стануваат се поприсутни на Икс“, рече Андерсон.

Австралискиот медиум го затвори и својот профил @abcemergency и ги упати луѓето до нивната локална радио станица и веб-страницата на „Еј-Би-Си“ за итни информации.