Австралискиот премиер Ентони Албанезе објави дека земјата денес официјално ја признала „независноста и суверенитетот на Државата Палестина“.

Во документ објавен од Албанезе на Платформа X, се наведува дека Австралија ги признава „легитимните и долгогодишни аспирации на народот на Палестина да има своја држава“.

„Признавањето на палестинската државност од страна на Австралија, заедно со Канада и Велика Британија, е дел од координираниот меѓународен напор за создавање можности за решение со две држави“, се вели во соопштението.

Во документот се наведува дека почетокот на таквите можности би бил „стапување во сила на прекинот на огнот во Газа и ослободување на заложниците“, кои се држат во заробеништво од палестинската милитантна група Хамас од октомври 2023 година.

Се додава дека меѓународната заедница поставила „јасни барања“ пред палестинската власт.

„Терористичката организација Хамас не смее да има улога во Палестина“, се наведува, меѓу другото, во документот за австралиското признавање на палестинската државност.