43-годишен Австралиец е уапсен и осомничен за суровост кон животните, откако убил речиси сто кенгури, соопшти денеска локалната полиција, според австралиските медиуми.

Полицијата во државата Нов Јужен Велс соопшти дека 98 мртви кенгури биле пронајдени во октомври во регионот Хантер, северно од Сиднеј, заедно со кутија со муниција и чаури.

Уапсен е еден човек, кој ќе одговара за суровост кон животните, но и за повеќе други кривични дела поврзани со нелегално поседување оружје. Застреланите животни биле пронајдени на територијата на воена база која се користи за обука на пешадиски единици. Не е соопштено дали осомничениот е поврзан со војската.

Запленети се три парчиња огнено оружје, а осомничениот ќе се појави пред суд во јануари, соопшти полицијата. Доколку биде осуден по сите обвиненија, нему му се заканува казна затвор и од 20 години.