Најдобриот светски тенисер Новак Ѓоковиќ, денеска се најде на удар на АТП, а причината е ПТПА ( Асоцијацијата на професионални тенисери) која вчера доби нов советодавен одбор.
ПТПА која ја основаа Ѓоковиќ и Васек Поспишил се обидува да се избори за поголеми права на тенисерите и главен акцент е ставен на послаборангираните играчи, а со таквото дејствување и сметаат на главната организација во тенисот, АТП.

Вчера ПТПА објави дека е формиран советодавен одбор каде вниманието на јавноста го провлече името на Бил Ејкман. Станува збор за милијардер од САД што претставува потврда дека ПТПА не се откажува од борбата за поголеми права на тенисерите.
Покрај Ејкман во одборот се наоѓаат уште и Мајкл Хиршер, Ребека Мекдоналд, Катарина Пјетловиќ и Антон Раби. Поради тоа денеска со соопштение реагираше и АТП.
– Заштитата на интересите на тенисот и тенисерите е принцип на АТП уште од неговото формирање во 1972 година“, пишува во дел од соопштението на АТП.

Тие исто така потенцираат дека постои организација која се нарекува Совет на играчи и која се бира на демократски начин од страна на сите тенисери, додека формирањето на ПТПА го нарушува работењето на Советот.
„Формирањето на друг ентитет на играчи прави јасна разлика, поделба на тенисерите како и поделба на управувањето со тенисот. АТП ќе продолжи да прави се што е во нејзина моќ за да ги заштити интересите на своите членови, играчи и турнири“, пишува АТП.