Атлетико Мадрид го декласираше Реал Мадрид со 5:2 и му го нанесе првиот пораз оваа сезона. Историска вечер на „Метрополитано“, бидејќи „јорганџиите“ првпат по цели 75 години постигнаа пет гола во градското дерби.

Поразот е уште потежок за Реал затоа што Атлетико досега имаше само две победи во сите натпреварувања од почетокот на сезоната. Мадридските медиуми се обидуваат да го ублажат дебаклот, но аналитичарите предупредуваат дека Чаби Алонсо е под сериозен притисок. Особено загрижува фактот што Реал на двата најголеми теста – против ПСЖ и синоќа со Атлетико – прими вкупно девет голови. Дополнителен проблем е што пет од шесте победи оваа сезона дојдоа против екипи од долниот дел на табелата.

Следниот голем испит е „Ел Класико“ на 26 октомври, кој може да биде клучен за иднината на Алонсо. Барселона, пак, уште вечерва може да го преземе врвот на табелата доколку го совлада Реал Сосиедад на „Монжуик“.