Во време на активна и секојдневна борба со ковид-19, нашите вистински супер-херои и супер-хероини се, всушност, околу нас – здравствените работници, вработените во маркети, текстилните работници, полицијата, војската, пожарникарите. Сите оние кои се на своето работно место секојдневно, за ние да можеме да останеме дома и на тој начин да се заштитиме и себеси и нашите семејства, објавија „Штип арт-активисти“, кои ја реализираа акцијата „Биди супер-херој, почитувај ги мерките за заштита!“

– Како локални активисти ја направивме оваа акција со која укажуваме да се почитуваат препораките и мерките кои се донесени од страна на Министерството за здравство. Акцијата се однесува на мерките како што е растојанието кое треба да го одржуваме, правото на користење на годишен одмор и мерките кои треба да ги преземат работодавачите и превозниците за спречување на ширење на ковид-19.

Во оваа, како и во претходните акции на „Штип арт-активисти“, ги искористивме хероите на Марвел, познатите Хулк, Тор и Капетан Америка. Сакавме, пред сè, на недвосмислен и јасен визуелен начин да ги споредиме нашите сограѓани со холивудските супер-херои, и на тој начин да ги охрабриме да ги почитуваат мерките.

Со оваа споредба сакавме да ги потсетиме штипјани дека единствено со почитување на мерките сите ние можеме да сме супер-херои, да дадеме свој придонес, и на тој начин да искажеме благодарност до нашите здравствени работници, полицајците, пожарникарите, војниците, вработените во маркетите и текстилните работници/чки за нивната пожртвувана работа.

Изразуваме благодарност и до здружението „Гласен Текстилец“, кое работи на унапредување на правата на текстилните работници/чки, што ни овозможи да ја вклучиме и нивната хероина Супер Текстилка во акцијата, за да укажеме на правата на вработените во големите хали. Текстилните работници/чки од нашиот град се оние кои во моментов ги изработуваат маските кои служат за превентива на сите граѓани, а со нашата акција потсетуваме дека во овој период, тие се оние на кои им е најпотребна дополнителна заштита и превентивни мерки, соопштија штипските арт-активисти.