Европската Унија, сакала или не, ќе мора да биде порешителна со проширувањето, оценува амбасадорот Љупчо Арсовски, запрашан во која насока ќе влијае руската агресија на Украина врз бугарско-македонскиот спор и дали тоа ќе ја забрза европската интеграција, ќе го одложи прашањето или пак ќе придонесе Унијата да ѝ удоволи на Бугарија заради нејзината гео-стратешка важност.

– Воените дејствија на територијата на Украина, новопрогласените републики, првата средба меѓу руската и украинската делегација, новите остри и конкретни санкции на САД и западните европски држави против Русија се нови состојби за ЕУ и оттаму природно е дека одредени прашања на дневен ред ќе бидат оставени на „споровозна пруга“. Врзано за македонско-бугарскиот спор кој го наметна Бугарија, факт е дека постои засилување и одреден интензитет на комуникацијата меѓу двете земји, каде, пак, опозициските партии се „загрижени“ за тоа што се подготвува и прашуваат како ќе се надминат неколку прилично чувствителни прашања. Бугарија, која е во првата линија на земји кои преку Црното Море граничат и со Украина и со Русија е на специфичен алертен степен на готовност, особено заради фактот што на нејзината територија своевремено е инсталирана американска база од системот ШТИТ. Истовремено, заради одредени формулации во исказите на актуелниот бугарски министер за одбрана во прашање е неговата натамошна функција, што пак, секако, ќе предизвика и потрес во коалиционата влада. Вреди да се спомне и изјавата на поранешниот бугарски премиер Костов кој смета дека 3 март како национален празник на Бугарија не треба повеќе да се празнува оти е рецидив од минатото кој може да ѝ наштети нна Бугарија. Поделбата на проруски настроени сили и про НАТО и ЕУ во Бугарија, но и во други земји на нашето опкружување може да најави многу несакани настани во иднина и затоа ЕУ сакала или не мора порешително да застане зад одредени процеси, особено во земјите на Западен Балкан кои се определни кон европскиот курс – вели Арсовски за „Слободен печат“.

Во секој случај, вели тој, македонската страна треба со максимална мудрост и решителност да опстои на неколку позиции без непотребно брзање и брзоплети изјави во очекување на заедничкиот европски став за почеток на преговорите.

– Франција, која претседава со Унијата, придружена од Словенија која претходно претседавше и со Чешка, која е следна, ќе треба да вложат максимални напори за безусловно тргање на ветото кое, по наметнатите прашања се коси и не соодветствува токму со критериумите врз кои се заснива самата Унија. Ова дотолку повеќе што нашата земја се наоѓа во интензивни подготвки за преземање на преседавањето со ОБСЕ, што е сериозен аргумент што македноснкиот врв мора благовремено да го искористи – вели Арсовски.