Градоначалничката Данела Арсовска повторно ќе менува директори судејќи според јавните конкурси објавени денеска за избор на нови директори на три јавни претпријатија.

Во наредните десет дена сите заинтересирани кои ги исполнуваат критериумите објавени во конкурсите можат да си ја „пробаат среќата“ и да аплицираат за прв човек на „Комунална хигиена“, на „Водовод и канализација“ или на „Паркови и зеленило“. Во огласите е наведено дека директорите ќе се избираат со мандат од 4 години, ама праксата во изминатите три години покажа дека и покрај објавените конкурси, ретко кој од назначените директори останал на функцијата барем една година.

Досега низ јавните претпријатија и установи продефилираа најмалку 30 директори, а во моментот не постои граѓанин кој може да именува некој од актуелните поради брзината со која се менуваат, освен можеби првиот човек на ЈСП „Скопје“ Драги Кушовски, кој поради проблемите со јавниот градски превоз е најекспониран во јавноста.

Трите директори кои моментално раководат со претпријатијата за кои се распишани конкурсите за избор беа назначени на функцијата пред неполни четири месеци. Дали некој од нив заслужил во изминатиот период да му биде продолжен мандатот во наредните четири години, ќе се види по завршувањето на конкурсите.

Актуелен директор на ЈП „Комунална хигиена“ е Јетон Незири, назначен на оваа функција на 8 август годинава и четврти по ред директор на ова јавно претпријатие во мандатот на Арсовска.

Два дена претходно градоначалничката го разреши дотогашниот директор на „Водовод и канализација“ Виктор Панчевски и на негово место за в.д. директор го именуваше Тони Миновски, вработен во претпријатието. Освен Миновски и Панчевски, во изминатите три години на чело на претпријатието застанаа и сега актуелниот министер за локална самоуправа Златко Перински, кого Арсовска го разреши со обвинување дека го „брцнал рачето во медот“ во врска со тендерот со пречистителната станица. На негово место го постави Марјан Митовски, во чиј мандат дојде до протест на вработените со барање за негово разрешување. По неколку месеци и Митовски беше разрешен, а за нов в.д директор поставен Драган Илиевски, кој дотогаш раководеше со Зоолошката градина. По него следеа Панчевски, па Миновски.

На Арсовска ни Панчевски не ѝ се погоди, назначи нов директор на „Водовод и канализација“

На 17 јуни годинава во директорската фотелја на „Паркови и зеленило“ седна Јетон Бучи кадар на ДУИ за директор на ЈП „Паркови и зеленило“. Пред него исто така за три години се променија неколкумина директори, а неговиот претходник Мартин Ангеловски, кој „траеше“ само два месеци, како што беше соопштено од Град Скопје беше разрешен поради неправилности при работењето и непочитувањето на договорот за вработување, при што беше најавена и вонредна ревизија во претпријатието.

Истиот ден и од исти причини беше разрешен и првиот човек на ЈП „Дрисла“ Александар Кузинаков, за чие работење како што тврдеа од Град Скопје , до нив пристигнале бројни пријави со индиции за злоупотреба и пречекорување на овластувањата.

Справувањето со корупцијата и самоволието во градот Скопје беше и едно од главните предизборни ветување на градоначалничката Данела Арсовска. Никој не смее да си поигрува со народните пари, а уште помалку со довербата на граѓаните на градот Скопје – посочија тогаш од Град Скопје.

Притоа, оттаму најавија итно спроведување вонредна ревизија во работењето на сите јавни градски претпријатија.

Резултатите од спроведената ревизија ќе бидат објавени јавно, а доколку бидат констатирани и неправилности при работењето на раководните лица во претпријатијата, за истите ќе бидат известени и соодветните надлежни институции – соопштија од Градот.

Досега, иако од тогаш поминаа четири месеци, ниту јавноста беше информирана дали се спроведе ревизијата, ниту јавно се објавија резултатите, ниту се соопшти што и како згрешиле разрешените директори, кои јавно беа обвинети за неправилности во работата.