Началникот на Генералштабот на Армијата на Република Македонија, генерал-мајор Сашко Лафчиски, денес, 14 мај 2025 година, во седиштето на НАТО во Брисел, Кралството Белгија, учествуваше на конференцијата на Воениот комитет на НАТО во формат на началници на генералштабови, соопшти Министерството за одбрана.

Во текот на конференцијата, генералот Лафчиски активно учествувал во дискусиите и нагласил дека интероперабилноста останува клучна за подготвеноста на НАТО.

„Преку остварување на нашите цели и соработка со сојузниците, ние ги поддржуваме напорите на НАТО за одговор на сегашните и идните закани“, наведе генералот Лафчиски.

„Во врска со учеството на нашата Армија во мисии предводени од НАТО, генералот Лафчиски ја истакна јасната определба за подготвеноста на армиските сили, како и определбата за солидарноста кон сојузниците преку учество во мисии за соодветно одвраќање водени од НАТО. Беше нагласено дека македонските војници активно учествуваат во мисите на НАТО на источното крило на Алијансата, поточно во Бугарија, Романија и Латвија. Во оваа прилика беше истакната и улогата на нашата Армија во колективната обука на НАТО преку нашето учество во НАТО водените вежби“, велат од МО.