Како што официјално објави фудбалскиот клуб Башкими 1947, нов играч на екипата е Арменд Алими (37).

Фудбалерот од средниот ред ќе настапува за тимот од Куманово кој по 16 години се врати во Првата македонска лига.

Алими својата професионална кариера ја почна токму во Башкими, потоа ги бранеше боите на Милано Куманово, Истра 1961, Оребро, Неа Саламис, Ермис Арадипу, Шкендија, Работнички и Беса.

За најдобрата македонска репрезентација играше во периодот од 2009 до 2016 година и запиша 14 настапи.

По разделбата со Баже Јанакиевски, Башкими го промовираше Муарем Муарем за нов тренер. Клубот го напуштија Аган Алиу, Албан Мемети, Хусеин Демири, Арлинд Хасани, Егзон Азири, Амар Имери и Христијан Митревски.

Соработката со Башкими ја продолжија Ардит Демири, Амир Јашар, Борјан Пановски, Емир Асани, Филип Алексовски, Муарем Мислими и Самет Реџепи.