Повеќе од 30 години Тошо Филиповски е активен и пасиониран собирач на музички артефакти, изданија (винили, касети, компакт-дискови, ленти) и информации (списанија, фанзини, постери, флаери) за македонската рок-сцена.

Последниве 20-ина години беше обземен со идејата да направи енциклопедија на рок-музиката, верувајќи дека во Македонија има огромно музичко богатство, кое треба да биде ставено во некакви рамки. Резултат на неговиот ентузијазам беше првиот том на „Македонска рок енциклопедија“ (1963-2018), што го објави во 2018 година.

Енциклопедијата содржи текстови за 333 бенда, повеќе од 2.500 музичари, 400 фотографии и повеќе од 1.000 дискографски единици на околу 500 страници. Во иднина планира да објави уште два тома на енциклопедијата.

Грандиозниот потфат со рок-енциклопедијата на Филиповски му дава дополнителен ентузијазам, искуство и храброст да продолжи со својата животна мисија посветена на рок-музиката. Во 2019 година објавува уште една капитална книга. Првиот том на книгата „Македонска дискографија: Винили (1958-2019)“ го отпечати во тираж од 800 примероци. На насловната страница е Софија Филиповска, 11-годишната ќерка на Тошо, а дизајнот е на Ѓокица Зафировски. Книгата, на 476 страници, претставува 333 посебни единици. Во книгата комплетно се презентирани околу 230 винилни изданија (самостојни и заеднички) на македонски артисти и бендови.

Дополнително се посочени и околу 70 винилни изданија (компилации) на кои се застапени теми/песни/ленти на македонски артисти и бендови. Има 1.500 фотографии во боја, но и многу информации за самите изданија. Жанровски, монографијата ги претставува винилните изданија со рок, џез, блуз, електроника, хип-хоп, светска музика, поп-рок, панк, хеви-метал, реге, ска, фанк, соул музика.

Следното големо дело што Филиповски го најавува за септември оваа година е првиот том од „Македонски рок-времеплов“. Станува збор за книга со енциклопедиски карактер што ќе содржи 1500+ датуми кои ја детерминираат македонската музика.

Во меѓувреме, активно користејќи го карантинскиот период во кој е втурната целата држава, Филиповски иницираше гласање преку социјалната мрежа Фејсбук за избор на 100 македонски албуми/песни кои најсилно останале во меморијата на слушателите.

– Се обидовме со гласовите од околу 300 луѓе да создадеме една листа на 100 нај (слушани, сакани, значајни, влијателни) македонски песни и албуми. Од самата листа произлезе и создавање еден регистар на изданија, кој го дополнувам секојдневно. Засега, само кај официјалните изданија, ја надминав бројката од 2.000 изданија, а сум далеку од крајот. Листата е само иницијација за некој следен, многу пообемно и поквалитетно организиран, национален избор – вели Филиповски.

На листата по првото гласање имало околу 900 песни и 500 музички изданија од кои била составена финалната листа. Крајната цел на листата не е да рангира, туку да покаже дека во Македонија имало и има релевантна и голема музичка сцена.

Листа со 100 македонски албуми/песни:

1. Мизар – Мизар 12″ (ЛП)
2. Архангел – Архангел 2 (MC)
3. Анастасија – Пред дождот (ЦД)
4. Архангел – Архангел 12″ (ЛП)
5. Мизар – Свјат Dreams 1762 – 1991 12″ (ЛП)
6. Санаториум – На работ на разумот (MC)
7. Леб и сол – Као какао 12″ (ЛП)
8. Леб и сол – Леб и сол 2 12″ (ЛП)
9. Бастион – Бастион 12″ (ЛП)
10. С.А.Ф. – Сафизам (ЦД)
11. Леб и сол – Леб и сол 12″ (ЛП)
12. Архангел – Heart Core (ЦД)
13. Стринг форсис – Изохронија (ЦД)
14. Ласт експедишн – Ласт експедишн (ЦД бокс)
15. Конкорд – Have The Blues 12″ (ЛП)
16. Ласт експедишн – Изгубени ликови (MC)
17. Суперхикс – Чекај бе, викам….каде бе малку! (ЦД)
18. Т.Б. Трачери – Клати и Тркалај (ЦД)
19. Чиста Околина – Новиот аспект на старата школа (MC)
20. Don’t! Who? One. – Higherground (MC)
21. Леб и сол – Ручни рад 12″ (ЛП)
22. Bernays Propaganda – Happiness machines 12″ (ЛП)
23. Бодан Арсовски – Endless View (ЦД)
24. Ден за ден – Ден за ден 12″ (ЛП)
25. Lola V. Stain – Мансарда/ Икона (ЦД)
26. Анастасија – Ноктурнал (ЦД)
27. Suns – Мојот сон е само мој (MC)
28. Верка – Моторни песни (ЦД)
29. Чоканче 1 & 2 (MCx2)
30. Мозаик – Мозаик (ЦД)
31. Мизар – Кобна убавина (ЦД)
32. Влатко Стефановски и Мирослав Тадиќ – Крушево (ЦД)
33. Фолтин – Архимед (ЦД)
34. Brigade O.D. – Smash the army before they smash you! (MC)
35. Анастасија – Мелургија (ЦД)
36. Падот на Византија – Почеток и крај 12″ (ЛП+ЦД)
37. Патика – Ео-Ео 12″ (ЛП)
38. Фолтин – Ло-ле-та-тоо (ЦД)
39. Флукс – Старо аро (ЦД)
40. Архангел – Небесна машина (ЦД)
41. Т.Б. Трачери – Купи ме (ЦД)
42. Bernays Propaganda – Политика 12″ (ЛП)
43. Тоше Проески – Игри без граници (ЦД)
44. Ареа – Врати на имагинацијата (ЦД)
45. No Name Nation – У пичку матер (ЦД)
46. ПМГ Колектив – Резонатор (ЦД)
47. Bernays Propaganda – My personal holiday 12″ (ЛП)
48. Зијан – Низводно (МС)
49. Студени нозе – Нејќу колор телевизор!!! (МC)
50. Д.Н.О. – Тишина (ЦД)
51. Горан Трајкоски – Тешкиот глас на новите химни (ЦД)
52. Foolish Green – Escape (ЦД)
53. Апореа – На Реках вавилонских (MC)
54. Бадмингтонс – После мене што ти е гајле (МС)
55. Меморија – Оган под ѕвездите 12″ (ЛП)
56. Мизар – Поглед кон цветната градина (ЦД)
57. Ристо Бомбата и Кучешка тенија – Има ли тесна? (MC)
58. Bernays Propaganda – Втора младост, Трета светска војна (ЦД)
59. Xavier Acid – И по Тито – Техно (MC)
60. Кирил – Homebound (ЦД)
61. Кисмет – Dreaming (ЦД)
62. Т.Б. Трачери – Шлагери од содома (ЦД)
63. Киборг s/t (MC)
64. Суперхикс – Трумано (ЦД)
65. Александар Македонски – За херои и принцези 12″ (ЛП)
66. Сињак Timeless gathering (ЦД)
67. Смут – Мемоарите на скршениот човек (ЦД)
68. Bernays Propaganda – Забранета планета 12″ (ЛП)
69. Д’Далтонс – De Luxe (ЦД)
70. Драган Ѓаконовски – Шпато s/t 12″ (ЛП)
71. Фронтал кортекс – Ignorance and knowledge (ЦД)
72. Јаков Дренковски – C’est La Vie 12″ (ЛП)
73. FxPxOx – Не знаеш што е тоа човек 12″ (ЕП)
74. Рок Агресори – Ебена антикултура (MC)
75. Pluto’s Doubt – Сизиф (ЦД)
76. Ексик – So many loves (ЦД)
77. Културно Уметнички Работници – К.У.Р. (ЦД)
78. Фолтин – Пијан славеј (ЦД)
79. Ласт експедишн – Интро (MC)
80. ХаХаХа – Сами мажи и жени 12″ (ЛП)
81. Тело-Наука Совршена – Кадис (MC)
82. Бис-Без – Дал да плачам ил да пејам (MC)
83. ХаХаХа – Сиромашни и богати 12″ (ЛП)
84. Фолтин – Оваа трансплантирана машина за чукање… (ЦД)
85. Клержо – Ритуал и пепел (MC)
86. Бумбикс – Во оазата на мирот (ЦД)
87. Кирил – Religion & Sex (ЦД)
88. Bei The Fish – Time to make things right (ЦД)
89. Паркети – Грижа на совеста (MC)
90. Хип – The Songs about books and flowers (MC)
91. The John – The Waufvw!!! (ЦД)
92. Мугер Фугер и Горан Трајкоски – Во она време 12″ (ЛП)
93. My Tear – My Tear 12″ (ЛП)
94. Темпера – Играј! (ЦД)
95. ХаХаХа – Танго Револуционер 12″ (ЛП)
96. Автограм – На југ (MC)
97. Кристо Роџевски Batania 12″ (ЛП)
98. Мугер Фугер – Мугер Фугер (ЦД)
99. Гуру Харе – Overdose од блуз (ЦД)
100. Бла-Бла-Бла – Бла-Бла-Бла (ЦД)

Ентузијазмот и меракот на Тошо Филиповски не завршуваат тука. Покрај објавата на енциклопедиски книги, негова голема желба е да успее да создаде истражувачки центар, музеј или архив посветен на историјата на македонската музика.

(Текстот и топ-листата се објавени во „Културен печат“ број 34, во печатеното и електронското издание на „Слободен печат“ на 5-7 јуни 2020)