Антимонополските власти на ЕУ повторно ја отвораат истрагата за понудата од 36 милијарди долари на американската мултинационална компанија за кондиторски производи и производи за домашни миленици „Марс“ за „Келанова“, производителот на чипсови „принглс“, поставувајќи рок за нивната одлука до 19 декември, според ажурирање на веб-страницата на Европската комисија, цитирано од Ројтерс.

Комисијата, која делува како тело за спроведување на конкуренцијата на ЕУ, привремено ја суспендираше својата истрага кон крајот на јули додека чекаше компаниите да ги достават бараните информации. Извршното тело на ЕУ започна целосна истрага во јуни, предупредувајќи дека договорот може да доведе до повисоки цени и да ја зајакне позицијата на „Марс“ во преговорите со трговците на мало. Договорот, меѓу најголемите во индустријата и веќе безусловно одобрен во Соединетите Американски Држави, ќе ги собере брендовите од M&M, „сникерс“ и „вискас“ до „принглс“, „поп-тартс“ и житарките за појадок на Келог’с под еден покрив, пренесува БТА.