Државната комисија за спречување корупција со осомничена претседателка и извалкан углед ќе продолжи да одлучува за постапките, пријавите и иницијативите кои ќе стигнат до нив, но и ќе решаваат за постапки што веќе се поднесени за актуелни министри, советници и директори.

Ниту осомничената претседателка во истрагата за случајот „Адитив“, Татјана Димитровска, ниту членовите на Комисијата немаат намера да поднесат оставка, ниту пак да ги ревидираат предметите кои имаат поврзаност со случајот за кој одлучувале, а се со потпис на Димитровска која е осомничена дека оддавала тајни информации поврзани со истрагата.

– Досега во ДКСК не е депонирана оставка од страна на Татјана Димитровска, меѓутоа оставка се доставува до Собранието на РСМ, кое во случај на оставка би требало да констатира престанок на функцијата. Останатите членови не можат да бидат одговорни за дејствија за кои е поведена истражна постапка против претседателката како поединец и оттаму не се чувствуваат повикани да поднесат оставки – велат за „Слободен печат“ од Државната комисија за спречување корупција.

Оставка не планира да си поднесе и таа, па во писмо до јавноста тврди дека со поранешниот директор на ТЕЦ Неготино Небојша Стојановиќ, обвинет во „Адитив“ комуницирала како со семеен пријател, но нивните разговори немале никаква врска со предметот.

– Од соопштението од ОЈО за ГОКК се согледува дека нашата комуникација траела до декември 2024 година, или пред да му е изречена мерка притвор по оваа мерка кон него, кога јас престанувам со комуникација. Содржината на комуникацијата се однесува на разговори без никаква поврзаност со случајот „Адитив“. Дел од споделените информации се однесуваат на јавни документи чија содржина пред нашата комуникација е објавена во јавност, а останатиот дел е вообичаена пријателска комуникација. За оваа моја комуникација изразувам жалење и укажувам дека е направена без никаква намера да влијаам на постапката или на кој било аспект на истрагата. Ова го тврдам одговорно – напиша во изјавата Димитровска на која ѝ се одредени мерки за претпазливост, односно одземен ѝ е пасошот и не може да ги извршува работните обврски.

Иницијатива за нејзино разрешување нема ниту во Собранието, од каде рекоа дека ќе го чекаат исходот на постапката.

– Во Собранието на Република Северна Македонија, до овој момент, нема пристигнато оставка од страна на претседателката на ДКСК. Кога оставка ќе пристигне во Собранието, се констатира на пленарна седница, како што е предвидено со Деловникот – велат од Собранието за „Слободен печат“.

ДКСК одлучувала по две пријави за „Адитив“

За предметот „Адитив“ пријави стигнале и до Антикорупциската комисија која со потпис на Димитровска ги отфрлила, но Комисијата не планира да прави ревизија на овие одлуки затоа што биле донесени колективно и затоа што биле законски.

– Одлуките се донесени колективно од Државната комисија, на јавна седница, согласно со Законот за спречување на корупцијата и судирот на интереси и Деловникот за работа на Државната комисија, поради што нема потреба за нивно ревидирање. Одлуките кои се донесени се правилни и законити и со истите не е отстапено од законски регулираниот начин на постапување и донесување одлуки, ниту од воспоставената пракса во институцијата во исти или слични предмети – објаснуваат од ДКСК за „Слободен печат“.

Двете пријави се во периодот за кој Димитровска е осомничена дека оддавала службени информации преку „вибер“ и „ватсап“ од својот мобилен телефон од јуни до декември минатата година. Првата пријава е отфрлена во јуни минатата година „поради промена на фактичката состојба“. Поднесена била од непознат сторител за набавка на адитиви за намалување на формирање на згура-троска во котли при согорување на јаглен. Пријавата е всушност против член на Управниот одбор на АД ЕСМ кој бил близок со сопственичката на фирма која го добила тендерот на ЕСМ, а му била роднина на членот на Управниот одбор. Но Антикорупциска ја отфрла пријавата со образложение дека тендерот бил во 2023 година, членот бил во Управен одбор до 2022 година.

Брзо потоа поднесена е уште една пријава во која се посочувало дека сопственичката на фирмата која го добила тендерот за адитиви била всушност вработени и во АД Пошти, за што пишуваше и Истражувачката репортерска лабораторија.

Оваа постапка е запрена во декември минатата година бидејќи Обвинителството имало отворено случај за ова.

– За едната постапка е донесена одлука за запирање на постапката затоа што Јавното обвинителство веќе имало поведено постапка, така што секакво паралелно постапување од наша страна може да претставува мешање во работата на Обвинителството. Во вториот предмет не се работи за сомнежи за корупција туку за пријава за судир на интереси, по која постапка донесовме одлука со која констатиравме дека не постои судир на интереси, затоа што пријавеното службено лице во периодот за кој се однесува пријавата веќе не ја вршело функцијата и воопшто не можело да се најде во состојба на судир на интереси – велат од ДКСК за пријавите.