Англиските легенди удрија по фудбалерите на Ливерпул: Срамота, играат како деца
Тешкиот пораз на Ливерпул на гостувањето кај Наполи од 4:1 на стартот од Лигата на шампионите предизвика остри критики кај англиската јавност, посебно кај поранешните фудбалери.
Препорачано
Крај на циклусот, масовен физички пад, самоубиствен фудбал, срамна одбрана, играат како деца и срамно, се само дел од критиките што ги упатуваат легендите на англискиот фудбал за анализата на играта на Ливерпул.
– Проблемот не е овој натпревар, заборавете на овој натпревар. Голема грижа за мене е дали со ваква игра ќе продолжат во текот на сезоната. Дали се наоѓаме на крајот на циклусот? – јавно се прашува поранешниот капитен на Ливерпул, Џејми Карагер.
Тој не штедеше зборови за управата на „црвените“ и лошата трансфер политиката во летниот преоден рок, но и кон филозофијата на играта.
– Дали се соочуваме со голем физички пад поради начинот на кој играат фудбалерите и интензитетот во последните пет-шест години? Ако продолжат да играат вака, мислам дека тоа се последиците од високиот интензитет во последните години. Ќе имаат големи проблеми во Премиер лигата и Лигата на шампионите. Ова што го прикажува Ливерпул е самоубиствен фудбал. Ливерпул престана да биде еден од најдобрите тимови во Премиер лигата и Европа. Тоа значи дека повеќе ќе се брани, со што повеќе до израз ќе доаѓаат маните во дефанзивата. Играчите на Ливерпул се помалку ќе ја имаат топката во своите нозе. Срамно е да се гледа тоа што се случува со нив. Гомез и Ван Дајк играат како деца.
Поранешниот играч на Лидс и на Реал Мадрид, Џонатан Вудгејт, смета дека на Ливерпул му недостасува енергија и дека Наполи ги уништил „црвените“, додека поранешниот капитен на Манчестер јунајтед и англиската репрезентација, Рио Фердинанд тешкиот пораз од Наполи го опиша како срамен.
– Ретки се моментите кога може да се каже дека на Ливерпул му недостасуваше желба и борба. Во Неапол му недостигаше сето тоа. Многу од нивните големи ѕвезди не се ни приближно на нивото на кое сме навикнати да ги гледаме – рече Фердинанд.
Критичен кон играчите на Ливерпул беше и поранешниот играч на „црвените“, Мајкл Овен.
– Како што стојат работите, оваа сезона може да биде за заборав што се однесува до Ливерпул. Навивачите на Ливерпул одамна не виделе вакво нешто.
