Информациите поврзани со даночното ослободување на спортските субјекти преку т.н. „ваучерски систем“ што во петокот ги изнесоа членовите на Државната комисија за спречување на корупцијата (ДКСК), се тенденциозни и целосно неточни, уверуваат, преку соопштението испратено до јавноста, од Агенцијата за млади и спорт (АМС). Станува збор за наводите кои Антикорупциската комисија ги проследи со најава на иницијатива за кривично гонење на директорот на Агенцијата Наумче Мојсовски, со барање до Владата за утврдување на неговата одговорност и со препорака до УЈП за засилен надзор врз спортските федерации, клубови и спортисти поединци, корисници на спортските ваучери.

– Сакаме да потенцираме дека и на јавната седница на ДКСК, но и преку тенденциозни соопштенија на одредени спортски институции инспирирани единствено од лукративни цели, се изнесоа еден куп невистини и погрешно утврдени факти за примената на Законот за спортот и подзаконските акти кои се однесуваат во делот на даночните олеснувања, а се во функција на финансиска поддршка на македонскиот спортски систем – соопштија од Агенцијата.

Оттаму, пред се, укажуваат на јавното обраќање, „исполнето со грст невистини од страна на претседателот на МОК г-дин Даниел Димевски, кое случајно коинцидира со денот на одржување на седницата на ДКСК“.

– Имено, господинoт Димевски јавно побара разрешување во АМС и итно замрзнување на постапката за доделување на спортски ваучери. При тоа ова е побарано од човекот кој е идејниот творец и креатор на системот на спортски ваучери, човекот кој во 2020 година кумулира две функции претседател на централната комисија за доделување на спортски ваучери, член на управниот одбор на МОК, а подоцна и негов претседател, и во исто време човек кој истата таа 2020 година побарува износ од 15 милиони денари за МОК иако требало како претседател да биде свесен дека таа институција во тој момент не ги исполнува законските услови за регулирана спортска дејност – потенцираат од Агенцијата.

Основната идеја за донесувањето на мерките за даночни олеснувања во форма на ваучери за спортските субјекти уредени првично со измените во Законот за спортот од 2019 година, според Агенцијата, беше да се зголеми државната поддршка на македонскиот спортски систем и да се стимулира приватниот сектор повеќе да инвестира во спортот.

Од Агенцијата ја коригираат и Антикорупциската комисија.

– Членовите на Централната комисија се на предлог на Владата, но тие не се оние кои ги „доделуваат” ваучерите за даночно ослободување, како што е посочено од страна на ДКСК, туку се административна комисија која врши само административно-техничка обработка и евалуација на пристигнатите апликации и предлог-листата ја доставува до Советот за спорт, кое е стручно-советодавно тело, согласно член 25 од Законот за спортот. Советот за спорт во рок од пет дена од приемот на предлог-листата на спортски субјекти кои ги исполнуваат критериумите за користење на средства од даночното ослободување, на седница ја утврдува и усвојува предлог ранг-листата. Вака усвоената листа на субјекти Агенцијата за млади и спорт ја објавува на својата веб-страница – се вели во објаснувањето.

АМС, според соопштеното, очекува дека надлежните институции во најкраток можен рок ќе се произнесат за обвинувањата на ДКСК со цел јавноста да има целосен увид во работата на Агенцијата.

– Истовремено најавуваме дека Агенцијата за млади и спорт е целосно отворена за соработка со сите надлежни институции и воедно заедно со директорот Мојсовски ќе ги преземеме сите правни процеси со цел да се заштити угледот на институцијата – се додава во соопштението на Агенцијата за млади и спорт.