Тренерот на Манчестер јунајтед, Рубен Аморим, остро ја прокоментира слабата сезона на неговиот тим во Премиер лигата, признавајќи дека се чувствува засрамено од моменталниот пласман на табелата и начинот на кој тимот се однесува на теренот.

Португалецот го презеде клубот во ноември минатата година, но резултатите се далеку од очекуваните,  само шест победи во 25 натпревари, со дополнителни шест нерешени резултати и дури 13 порази. Последниот дојде токму вчера на „Олд Трафорд“, каде Јунајтед загуби со 0:2 од Вест хем.

Клубот моментално се наоѓа на 16. место на табелата во Премиер лигата, што е далеку под стандардите на тим од рангот на Манчестер јунајтед. И покрај тоа, „црвените ѓаволи“ сè уште имаат шанса да ја спасат сезоната преку финалето на Лига Европа, каде ќе се сретнат со Тотенхем, уште еден клуб кој потфрли оваа сезона.

„Мораме да чувствуваме дека е крај на светот кога нема да победиме. Се срамам кога ќе ја погледнам табелата во Премиер лигата. За мене, дури и ако ја освоиме Лига Европа, тоа не е доволно,  проблемите се многу подлабоки од еден трофеј“, изјави Аморим.

Тој додаде дека е потребна темелна анализа на состојбата во клубот, нешто за кое зборуваа и неговите претходници на клупата, но никој досега не понудил јасно објаснување.

„Тешко е да се објасни. Имам чувство дека недостига итност во сè што правиме. Тоа е мојата најголема загриженост. Искрено, не сум загрижен за финалето. Потребна ни е промена што оди многу подлабоко од резултатите на теренот“, истакна Португалецот.