Федерален судија во Вашингтон ѝ нареди на администрацијата на американскиот претседател Доналд Трамп да ги запре планираните отпуштања на стотици вработени во Гласот на Америка (ВОА).

Судијата Ројс Ламберт рече дека владини претставници покажале „вознемирувачко непочитување“ кон претходните судски одлуки, додавајќи дека е потребно дополнително разгледување за да се утврди дали Агенцијата на САД за глобални медиуми (USAGM) го исполнила својот законски мандат да „служи како постојано сигурен и авторитативен извор на вести“, објави Ројтерс.

Одлуката дојде откако американската администрација ненадејно го запре емитувањето на ВОА во март преку извршна наредба, додека плановите за отпуштање на 532 вработени со полно работно време во агенцијата останаа на сила.

Судијата Ламберт во својата пресуда рече дека е јасно дека обвинетите, вклучувајќи ја агенцијата и вршителката на должноста генерален директор на ВОА, Кери Лејк, немале намера да ги почитуваат претходните забрани.

„Наместо тоа, тие продолжија со своите планови, очигледно игнорирајќи ги дури и основните законски обврски“, додаде Ламберт.

Администрацијата на Трамп, која се судри со „Гласот на Америка“ за време на првиот мандат поради критиките кон претседателот, ја назначи Кери Лејк, поранешна новинарка и водителка, за директорка на агенцијата за време на неговиот втор мандат.

Основан во 1942 година за борба против нацистичката пропаганда, „Гласот на Америка“ со текот на годините прерасна во глобална медиумска мрежа која достигнува 360 милиони луѓе неделно, според извештајот на USAGM од 2024 година.

Судијата Ламберт, назначен од поранешниот американски претседател Роналд Реган, сега разгледува серија тужби со кои се оспорува легалноста на отпуштањето и извршната наредба, вклучително и тужба поднесена од Мајкл Абрамовиц, директорот на „Гласот на Америка“.