Рускиот суд денеска го прогласи американскиот новинар Еван Гершкович за виновен за шпионажа и го осуди на 16 години затвор, објави државната новинска агенција РИА, во она што неговиот работодавец, Wall Street Journal, го опиша како фарса.

Судењето на 32-годишниот Гершкович, кој негира дека сторил нешто лошо и вели дека обвиненијата против него се лажни, започна минатиот месец во градот Екатеринбург.

Обвинителите тврдеа дека Гершкович собрал доверливи информации по наредби од американската Централна разузнавачка агенција (ЦИА) за компанија што произведува оклопни возила за руската војна во Украина.

Гершович е првиот американски новинар кој е уапсен под обвинение за шпионажа во Русија по Студената војна.

Процесот во случаите на шпионажа честопати трае со месеци, а необичната брзина со која неговото судење беше спроведено зад затворени врати ги поттикна шпекулациите дека е можна спогодба за размена на затвореници меѓу САД и Русија во која се вклучени Гершович и други Американци кои се држат во Русија.

Претходно обвинителството побара казна од 18 години, како што рече Екатерина Масленикова, претставник на судот во Екатеринбург.