Американскиот државен секретар Ентони Блинкен ги отфрли коментарите на идниот претседател Доналд Трамп дека сака да го преземе Гренланд, нарекувајќи ги лоша идеја која не заслужува дискусија, пишува Политико.

„Идејата за Гренланд не е добра, нема да се случи и не е нешто на што треба да трошиме време“, изјави Блинкен.

Трамп предизвика бура од реакции, велејќи дека нема да ја исклучи можноста за користење на економска или воена принуда за да добие контрола врз Гренланд, или на Панамскиот канал.

„Нема да исклучам. Можеби ќе биде неопходно да се направи нешто“, рече тој.

Зборувајќи заедно со францускиот министер за надворешни работи Жан-Ноел Баро, Блинкен истакна дека САД се „посилни“ и „поефикасни“ кога работат со сојузниците, а не кога кажуваат и прават работи што ги отуѓуваат.

Сепак, како што пренесува Политико, со заминувањето на Блинкен од функцијата за неколку дена, неговите коментари веројатно нема да помогнат да се уверат Европејците, особено затоа што идната администрација ветува радикален пресврт од сегашната надворешна политика на претседателот Џо Бајден.

Претходно денеска, Баро предупреди дека „не доаѓа предвид“ Европската унија да дозволи други земји „да ги нападнат нејзините суверени граници“. Зборувајќи заедно со Блинкен, Баро ги ублажи своите зборови, велејќи дека не верува дека САД всушност планираат инвазија на најголемиот остров во светот.