Амбасадата на Соединетите Американски Држави во земјава утрово испратила шокантна порака до сите организации кои имаат добиено и реализираат активности од тековни проекти, дека тие се запирааат. Оваа одлука доаѓа по извршната наредба на американскиот претседател Доналд Трамп, кој ги замрзна сите фондови за помош во странство (со исклучок на оние кои се однесуваат на Израел и Египет) во траење од 90 дена.

Како што пренесуваат медиумите во САД, ваквата наредба на Трамп шокирала многу дипломати, кои не очекувале дека наредбата ќе биде со таква „широчина“, односно дека ќе ја засегне целокупната американска поддршка за развој на демократијата во светот. Ваквата одлука, според некои претставници на Стејт департментот, може да доведе до тужби поради неисполнувањето на договорите.

Трамп и републиканците со години го опишуваа како „расипничко“ трошењето за странска помош во администрациите на Барак Обама и Џо Бајден. Се очекува Стејт департментот да подготви извештај во рок од 85 дена од издавањето на упатствата, по што ќе биде позната судбината на американските надворешни програми.