Тревор Рид веќе две години е во притвор во Русија. Американскиот државјанин сега пријавил дека искашлува крв, но дека затворот одбива да му ја пружи потребната медицинска помош.

Американската амбасада во Москва излезе со соопштение за состојбата на нејзиниот државјанин, кој, како што велат, е во многу лоша состојба.

„Во декември, Тревор Рид беше во присуство на друг затвореник со активна туберкулоза. Тревор сега вели дека кашла крв и не добил медицинска помош поради тоа. Го повикуваме Министерството за надворешни работи да му обезбеди на Тревор соодветен медицински третман или уште подобро – да го ослободи“, соопштија од Амбасадата на САД во Русија.

Семејствата на Тревор Рид, како и Пол Вилан, уште еден американски државјанин притворен во Русија, изразија загриженост за нивната ситуација, особено кога тензиите меѓу Москва и Вашингтон растат.

„Тревор Рид бил подложен на долг, близок контакт со затвореник кој имал активна туберкулоза во декември. Тој затвореник сериозно се разболел набргу по неговата средба со Тревор. И покрај почетокот на профилаксата за другите затвореници по изложувањето, руските власти одбија да го сторат истото за Тревор и досега не го ни тестирале“, изјави портпаролот на семејството Рид Џонатан Франкс.

Тревор се жали на болки во градите и често истакнува дека тешко дише. Како што истакна портпаролот на неговото семејство, пријавил и дека искашлува крв, што затворските чувари постојано го игнорираат.

Во целиот случај се вклучи и американскиот Стејт департмент, чии лидери се загрижени за третманот на Тревор Рид во Русија.

Иако американските медиуми постојано бараа коментар од руското Министерство за надворешни работи, како и од Федералниот казнено-поправен дом (ФСИН), тој никогаш не стигна.

Американските власти последен пат го посетија Рид, кој беше осуден на девет години затвор во јули 2020 година, кон крајот на минатата година. Оттогаш, повеќе од 200 дена не му е дозволено да контактира со родителите.

Друг поранешен маринец, кој се наоѓа во друга казнена колонија далеку надвор од Москва, изјави за Си-Ен-Ен минатата година дека „многу е тешко да се добие медицинска нега“.

Американскиот државен секретар Ентони Блинкен во неколку наврати повика на ослободување на приведените Американци за време на разговорите со рускиот министер за надворешни работи Сергеј Лавров.

„Мораме да зборуваме за двајца американски државјани, Пол Вилан и Тревор Рид, кои биле туристи во Русија. Потоа тие беа уапсени, осудени без веродостојни докази, а ние повторно бараме Русија да ја направи вистинската работа и да ги остави да се вратат дома“, рече Блинкен.