Амбасадата на Германија донираше амбулантско возило за Здравствениот Дом во Гостивар
Амбасадата на Сојузна Република Германија предаде донација за Здравствениот Дом во Гостивар во вид на амбулантско возило за потребите на граѓаните од градот и околината.
Препорачано
„Последните статистики за ковид во земјата не се охрабрувачки. Но се надевам дека ова медицинско возило доаѓа во вистинско време кога е потребна помош. Овде во регионот на Западен Балкан имаме партнери кои при борбата со пандемијата можат да се потпрат на нас. Германија до сега го поддржа регионот со 15 милиони евра. Освен тоа Eвропската Унија помага со 3,3 милијарди евра, во кои Германија учествува со скоро една третина“, рече амбасадорката Анке Холштајн.
Оваа донација e по иницијатива на Сојузната Влада за време на германското претседателство во Советот на Европската Унија, за помош на државите од Западен Балкан при пандемијата од ковид-19. Со оглед на актуелните состојби главен акцент на германското претседателство е справување со пандемијата и нејзините последици.
Вкупната вредност на оваа донација е 38.000 евра, а се имплементираше преку Министерството за надворешни работи на Сојузна Република Германија. Амбасадата му благодари на „Европскиот Центар за развој, толеранција и соработка“ од Гостивар за успешната имплементација на овој проект.
