Министерот за здравство, Азир Алиу рече дека Министерството за здравство подготвува внатрешна реорганизација за балансирање на медицинскиот кадар во согласност со потребите, како и за зголемување на транспарентноста и ефикасноста на услугите.

Тој во интервју за телевизијата Алсат-М, најави нови вработувања во здравството поради големиот недостиг на кадар во здравствениот сектор во државата.

„Здравствениот сектор е еко-систем што се соочува со сериозен недостиг на медицински сестри, технички кадар и лекари. Ние не можеме да го планираме буџетот врз основа на минатото, туку според реалните потреби. Во моментов го изработивме првиот нацрт-скен на состојбата, и имаме две сценарија: институции со сериозен недостиг и институции со повеќе кадар отколку што е потребно“ појасни Алиу.

На прашањето што се случи со ветувањето за 150 вработувања во Клиничката болница во Тетово, изјави дека не станува збор за неисполнети ветувања, туку за процес што е започнат и е при крај.

„Ние не ветивме, туку реализиравме. Процесот не е целосно завршен, но сите чекори за вработување на овие лица се завршени, освен потпишувањето на договорот и завршната средба со директорот. Ова е процес што веќе е во тек и не може да се поништи. Ниту министерот, ниту директорот не можат да одлучат да го откажат по локалните избори – едноставно тоа не е можно,“ изјави Алиу.