Алијанса за Албанците предводена од Арбен Таравари вечерва се очекува да ја формализира одлуката да излезе од Владата на премиерот Христијан Мицкоски. Неофицијално, Таравари ќе предложи министрите, замениците министри и директорите да ги депонираат оставките на премиерот за да демонстрираат единство и, како што брифираат од партијата, очекувањата се Централното претседателство едногласно да ја донесе одлуката за напуштање на „Илинденска“.
Мицкоски веќе им посака среќа во опозиција, иако, како што рече, не ги разбира зошто од власт одат во прегратките на ДУИ на Али Ахмети.

И додека Таравари е сигурен во верноста на вицепремиерот Арбен Фетаи и замениците Елфете Исмаили и Флакрон Беџети и игра на картата дека дел од директорите ќе се одметнат во Вреди, главната битка е да ги задржи петте пратеници. Токму нивното единство од една страна ќе значи дека АА ќе има пратеничка група, а од друга дека Вреди, односно власта, со само девет пратеници од заедниците ќе нема Бадентерово мнозинство. Тоа, пак, е аргумент повеќе на ДУИ дека власта нема легитимитет во претставувањето на албанското гласачко тело и затоа е оправдано нивното барање за предвремени парламентарни избори.
Според ова, извесно е дека ќе има реконструкција на Владата пред локалните избори и, како што веќе објавивме, за испразнетите места на делот од Алијансата на Таравари, Мицкоски ќе ги пополни со кандидати од Вреди.

Уште е нејасна вистинската причина за одметнувањето

По речиси еден месец тактизирање, Таравари изминатиот викенд јавно го најави излегувањето од Владата со изјавата дека подобро е да има пет градоначалници отколку двајца министри. За јавноста останува нејасно – која е вистинската причина АА да излезе од Владата, зашто Таравари во изјавите ги менуваше аргументите, особено откако и доскорешните партнери од Вреди и премиерот беа децидни дека не му е место во Владата ако на локалните избори соработува со ДУИ. Тој иако кажа дека одлуката е АА со свои листи да оди на локалните избори, сепак, не ја исклучи можноста за соработка со ДУИ. Потоа се пресмета дека е подобро да има повеќе градоначалници отколку министри за синоќа од Врапчиште да порача дека Албанците биле маргинализирани и дека Владата се изгубила на патот кон ЕУ.

– Минатата година побаравме поддршка за да донесеме промени. Но оваа промена што ја имаме, не е промената што ја очекуваа Албанците. Тоа е неоспорен факт. Владата некако се изгуби на патот кон ЕУ. Гледате каква е состојбата во државната администрација: има исклучителна маргинализација и тенденција Албанците да бидат маргинализирани – рече Таравари.

Тој порача дека ќе излезат од Владата за да се вратат посилни, особено во локалната власт, а потоа и во централната власт. Тој додаде дека не сакаат да бидат кукли во Владата.

– Или ќе бидеме како што треба или подобро да не бидеме во Владата. Бидејќи не сакам активистите да мислат дека ние сме се сместиле таму и оти не мислиме за Албанците. Штом не можеме да ги вработуваме, штом не можеме да им ја вршиме работата, тогаш е подобро да му се вратиме на народот – порача Таравари.

По превирањата во владината коалиција, и Мицкоски и Таравари потврдија дека неделава ќе има уште една средба. Откако премиерот му порача на Таравари дека требаше да биде доблесен, а не да ги влече за нос Владата и граѓаните и дека жали оти решил да му се врати во прегратките на Ахмети, лидерот на АА рече дека на Мицкоски ќе му ја објасни вистинската слика за случувањата во Владата и за нивната одлука.

– Премиерот Мицкоски во изминатиот период беше под голем притисок поради повеќе причини. Жал ми е што слушам дека и тој станува жртва на некакви уверувања. Единствената вистина е дека нашата партија одлучи да настапи со посебни листи за советници на локалните избори. Не сакаме повеќе да бидеме дел од таа клима на сомнежи, шпекулации и заговори. За жал, дел од политичарите Албанци во Владата не можат да се променат, тие се производ на стар политички менталитет – рече Таравари.

Тој вели дека АА нема да стане дел од Европскиот фронт предводен од Ахмети.

– Алијансата за Албанците не планира да стане дел од Европскиот фронт. Ќе одиме на избори со посебни листи за советници. Да станеме дел од Европскиот фронт – во никаков случај, ние дури и не разгледуваме таква можност – рече Таравари.

Но и самиот Таравари знае дека проблемот за Вреди и за Мицкоски не е дали тој ќе стане дел од Фронтот, туку можната соработка со ДУИ за локалните избори, која тој не ја исклучи. Тој ги сокри трите средби со Ахмети кои ни Вреди ни Мицкоски нема да му ги простат или, како што изјавија, „и во Влада и со ДУИ не оди“.

Меџити: „Падот на Владата“ не успеа

По изјавата на Мицкоски за прошталната средба со Таравари, Изет Меџити од Вреди порача дека конечно паднале маските. Тој додаде дека промената продолжува без лажни херои за еднократна употреба.

– Протагонистите од латино-серијата јавно го признаа она што го кажав многупати досега – дека цело време имале таен договор за соработка. Протагонистите на серијата, наречена „падот на Владата“, не успеаја. Ниту бомбастичните говори, ниту жртвите, ниту сервилноста, ниту патриотизмот со тапани не помогнаа – напиша Меџити на Фејсбук.

ДУИ, пак, оцени дека „со заминувањето на уште еден албански партнер, ова политичко мнозинство е целосно без легитимитет кај Албанците, целосно се претвори во моноетничка Влада. Од ДУИ велат дека за ова предупредиле уште од самиот почеток на создавањето на парламентарно мнозинство.

– Она што особено загрижува е што наместо да ги увиди сопствените промашувања, премиерот најавува уште поцврста и поагресивна политичка хајка за да оствари континуитет на оваа моноетничка Влада. Наместо да ја прифати реалноста дека народот бара предвремени избори, на терен веќе се демонстрира арогантна агресивност преку активности на уцени, подметнувања и поткуп. Овие очајни обиди да се добие барем некаков легитимитет ќе пропаднат, но зад себе ќе остават длабоки последици во нарушувањето на меѓуетничките односи – велат од ДУИ.

Според партијата на Ахмети, парламентарното мнозинство ги промашило клучните стратешки интереси на државата и поради тоа се распаѓа.

– Време е на предвремени парламентарни избори да се преиспита легитимитетот на политичките претставници – велат од ДУИ.

Мицкоски, пак, ја отфрли можноста со локалните да се одржат и парламентарни избори, но не и предвремени парламентарни избори следната година.