Светот вчера загуби еден од најголемите актери на сите времиња и човек кој долго време важеше за „најубавиот маж на светот“ – Ален Делон. Легендата на француската и светската кинематографија почина на 88-годишна возраст по долга борба со лошата здравствена состојба.

Ален Делон, за жал, последните години од животот ги помина болен и неспособен да живее самостојно, откако во 2019 година преживеа фатален мозочен удар. Неговата состојба беше толку тешка што во 2021 година тој дури и отворено зборуваше за својата желба да се подложи на евтаназија.

– Евтаназијата е најлогичната и најприродната работа. Од одредена возраст и време имаме право мирно да го напуштиме овој свет без болничко лекување или апарати за одржување во живот – изјави актерот во интервју од 2021 година.

Потоа, следната година, неговиот најстар син Антони Делон за РТЛ изјави дека татко му го замолил за помош во врска со евтаназија и дека се согласил да биде покрај него во последните моменти.

– Да, точно е, тоа ме праша – рекол Антони.

И додека во Франција евтаназијата не е легална, Делон планираше да ја направи во Швајцарија, каде што тоа е дозволено со закон, а чиј државјанин беше од 1999 година.

– Би сакал да им се заблагодарам на сите кои ме следеа со години и ми даваа голема поддршка. Се надевам дека идните актери ќе најдат во мене пример не само за работата, туку и во секојдневниот живот, меѓу победите и поразите. Ви благодарам – рече легендарната филмска ѕвезда во изјавата откако неговиот син откри дека Ален повеќе не сака да живее.

Колку Делон, и покрај славата, богатството и исполнетиот живот, бил очаен во последните години од својот живот, сведочи и неговото интервју во 2018 година што го даде за магазинот „Пари мач“. Потоа истакна дека е толку „болен од светот“, што би бил среќен да умре, но дека би сакал и неговото куче да умре со него.

– Го мразам времето во кое живееме, ми се повраќа од тоа. Постојат и луѓе што ги мразам. Сè е лага и само парите се важни. Ќе го напуштам овој свет без жалење – рекол Делон во 2018 година, додавајќи дека толку многу го сака своето куче, белгискиот овчар Лубо, што сака кучето да умре со него.

– Ако умрам пред него, ќе го замолам ветеринарот да одиме заедно. Сакам да му даде инјекција и да умре во моите раце. Повеќе би сакал да умре така, отколку да го оставам да умре од тага на мојот гроб – заклучил легендарниот актер.

Инаку, Делон во текот на животот беше голем љубител на кучиња, а на својот имот вдоми повеќе од 50 различни кучиња.

Почина Ален Делон, легендата на француската и светската кинематографија