За албанските граѓани кои патуваат кон Македонија, „зелениот картон“ за една година отсега ќе чини само 50 евра, објави Васил Стерјовски, претседателот на партијата Македонска алијанса за европска интеграција (МАЕИ).

Албанските власти го прифатија барањето на партијата и од денеска осигурителната полиса „зелен картон“ чини само 50 евра годишно, наместо 400 евра, колку што се плаќаше претходно, соопшти Стерјовски преку објава на „Фејсбук“.

„Ја изразуваме нашата благодарност до Агенцијата за финансиски надзор, која го зеде предвид барањето на нашата партија и одобри намалувањето на цената на осигурителната полиса „Зелен картон“ за патничките возила. Оваа одлука ќе донесе значителни финансиски олеснувања, особено за жителите на окрузите Корча и Пешкопеја, кои имаат тесни семејни, економски и културни врски со Македонија“, изјави за МИА Стерјовски.

Тој порача дека МАЕИ ќе продолжи да поддржува иницијативи што го подобруваат животот на граѓаните и го олеснуваат слободното движење.