Алармантно во полошкиот регион: Пожарот на депонијата кај Волковија се уште активен, граѓаните се гушат во чад
Печење на очи, гребење на крло, кашлица. Ова се симптомите на жителите од полошкиот регион веќе втор ден по вчерашниот пожар на депонијата кај тетовска Волковија од каде низ целиот регион се шири чад со канцерогени материи.
Препорачано
И утринава жителите од тетовско-гостиварскиот регион беа разбудени од екстремено загадениот воздух. Прозорец нема шанси да се отвори, но смрдеата веќе продира во нашита домови, велат тие.
„Полошкиот регион мислам дека треба да се отсече од овој цивилизиран свет оти ова тука што се случува го нема ниту во еден континет. Нема лето, а да не се запали некоја депонија. Преку зима големо аерозагадување, на лето исто дишиме канцерогени материи. За да биде трагедијата уште поголема овие депонии кои се палат се депонии каде се третира сметот од полошкиот регон или се општински или пак се дадени на приватни лица да менаџираат, но сепак на нив некој им дал концесија како треба да управуваат со сметот. Но, очигледно тука кај нас се е на диво, без контрола, се се води од личен или партиски интерес и затоа на крај сме стигнати до ова дереџе“, вели една жителка на Тетово.
„Налет и овој живот на 40 степени да не можеш да проветриш, сега само излегов од дома да пазарам тоа што ми е неопходно и толку, цел ден ќе седиме дома со семејството додека не се ликвидира пожарот“, додава друг жител на Тетово.
Од Територијалната противпожарна единица Тетово, велат дека досега на запалената депонија истуриле стотици тони вода, но пожарот не се ликвидирал. Се работи за илјадници тони отпад, ако еден слој се угаси, друг ќе се разгори и така е веќе два дена. Командирот на единицата Авни Амети, вели дека се во координацијата со државните институции кои ќе помогнат целосно да се ликвидира пожарот со копање на дупка на самата депонија и истурање на земја врз целиот смет.
„Ова е алармантно, на противпожарната единица Тетово треба да им излезат во пресрет другите институции дека граѓаните често се јавуваат поради екстремно загадениот воздух. Ние очекуваме и имаме најави дека ќе се вклучат другите институции, за да ја завршиме оваа работа. Јас вчера контактирав со Кризниот штаб и со еден експерт кој ми кажа дека таа депонија треба целосно да се ископа и потоа да се стави во дупка целиот смет и истиот да се покрие со земја. Само тоа е спасот, друг начин не постои.Досега сме истурила до 40 камиони вода, се работи за 10 тонски камиони и сега да пресметаме колку вода има истурено и пак не се ликвидира пожарот. Навистина е депонија голема и тука сите институциите треба да реагираат. Денеска имавме контакти со одредени институции и сметам дека денеска ќе биде изгаснат пожарот, граѓаните нека бидат смирени“, вели Авни Амети командир на ТППЕ Тетово.
Се работи за депонија за која Владата има дадено дозвола за третирање на отпад во наредните 15 години. Се наоѓа во атарот на село Волковија на површина поголема од еден фудбалски стадион, цела опкружена со ниви.
Концесионерот вчера кажа дека некој намерно му ја запалил депонијата. Најпрвин како што рече некои бараки биле запалени каде имало поставено камери за да не се остави трага, а потоа и купиштата смет и тоа ноќеска еден час по полноќ, што остава простор дека пожарот е подметнат.
Од Општина Брвеница, велат дека за третирање на отпадот на самата депонија сопственикот има легална дозвола издадена од Министерство за животна средина.
