Поранешниот возач во Формула 1 Жак Вилнев (53) верува дека преселбата на Луис Хамилтон во Ферари е добра за него. Хамилтон има освоено шест од седумте негови титули во Ф1 со Мерцедес. Вилнев вели дека ако Британецот победи во Ферари, ќе биде „засекогаш непобедлив“ во смисла на репутацијата што ќе ја остави зад себе.

Објавата за преселбата на Луис Хамилтон во Ферари во 2025 година го шокира светот на Ф1. Многумина се прашуваа зошто тој заминува од Мерцедес, но за Жак Вилнев тоа има смисла. Вилнев вели дека евентуална повторна титула со Мерцедес навистина не би послужила за никаква цел, бидејќи тој тоа веќе го направил шест пати.

– Тоа е Ферари. Тоа е најголемото име во автомобилската индустрија, односно во мотоспортот. Луис е големо име исто така. Затоа се поврзуваат. Ако може да освои титула со Ферари, ќе биде засекогаш непобедлив. Тоа е тоа. И ќе си го зацементира името. Многу е едноставно – вели Вилнев кој беше првак во 1997 година.

Хамилтон сега има ист број титули како и Михаел Шумахер, по седум. Ако освои уште една титула Луис ќе се осами на врвот, но ако тоа го стори со Ферари, ќе биде нешто ненадминливо смета Вилнев.

Ферари е рекордер во титули во конкуренција на конструкори. „Црното коњче“ има освоено 16 титули.

Хамилтон беше под слична лупа кога го напушти Мекларен и се пресели во Мерцедес во 2013 година.