Според аналитичката компанија „С3 партнерс“, големите трговци со краткорочни акции изгубиле околу 5 милијарди долари, а најголемите инвеститори стекнале профит од околу 5,5 милијарди долари

За разлика од вообичаената практика, вредноста на акциите да растат како последица на потезите на моќните инвестициски фондови, во овој случај „Гејмстоп“ го „напумпаа“ индивидуални инвеститори, организирани преку група на мрежата „Редит“, а преку апликации на мобилен телефон што овозможуваат тргувања

За да ја минимизираат загубата, големите хеџ-фондови веќе престанале да тргуваат со акциите, што не значи дека и понатаму вештачки ќе се крева вредноста на „Гејмстоп“ и на други компании за кои се намножиле „облози“ дека ќе пропаднат, како „Еј ем си ентертејмент холдингс“ и „Блекбери“

Бранот организирани купувања акции на компании без перспектива ја однесе првата жртва на Волстрит. Инвестицискиот хеџ-фонд „Мелвил капитал менаџмент“, за кој се верува дека бил главната цел на изненадувачкиот бран, спротивен на логиката на тргувања, во јануари изгубил 53 отсто од своите инвестиции, пишува весникот „Волстрит џрнал“, повикувајќи се на извори на кои им е позната состојбата во хеџ-фондот.

– Останаа само уште 47 отсто – триумфално порачал корисник на мрежата во која огромен број „аматери“ се здружија и тргнаа во инвестициска битка со „големите играчи“.

И покрај кревањето на неколку брани, се очекува бранот да продолжи и во текот на оваа недела. Организираните индивидуални инвеститори веќе неколку недели упорно купуваат акции на синџирот продавници за видеоигри „Гејмстоп“, како и на други компании во криза, кревајќи ја вртоглаво вредноста на нивните акции, а воедно предизвикувајќи големи загуби на моќните фондови што вложиле многу пари, обложувајќи се во нивниот „неминовен“ банкрот.

Во петокот, пред берзите да ги затворат вратите за викендот, било тргувано со 50 милиони акции на „Гејмстоп“, со што вредноста на акциите од почетокот на годинава се зголемила од 4 на дури 350 долари. Иако се смета дека синџирот продавници на видеоигри е пред затворање поради тоа што продажбата е префрлена „онлајн“, во оваа компанија се напумпани 4 милијарди долари и на моменти нејзините акции биле повредни од оние на „Епл“, „Фејсбук“ или „Дизни“. За разлика од вообичаената практика вредноста на акциите да растат како последица на потезите на моќните инвестициски фондови, во овој случај „Гејмстоп“ го „напумпаа“ индивидуални инвеститори, организирани преку група на мрежата „Редит“, а преку апликации на мобилен телефон што овозможуваат тргувања.

Се уште не е точно познато колку штета и профит предизвикала оваа шпекулативна акција. Според аналитичката компанија „С3 партнерс“, големите трговци со краткорочни акции изгубиле околу 5 милијарди долари, а најголемите инвеститори стекнале профит од околу 5,5 милијарди долари. Тргувањето со акции на „Гејмстоп“ неколкупати беше прекинувано, но се очекува и понатаму да продолжи.

Индивидуалните акционери всушност ја искористиле ранливоста на обичајот на хеџ-фондовите да се „обложуваат“ на пропаст на загрозени компании. При краткорочно тргување, инвеститорите остваруваат профит позајмувајќи акции за кои сметаат дека вредноста ќе им опаѓа и продавајќи ги, спуштајќи им ја уште повеќе цената. Во одреден момент тие ги купуваат истите акции по значително пониска цена, му ги враќаат на оној од кој ги позајмиле, а го задржуваат профитот.

Но, шпекулативното и особено масовно купување на акциите на „Гејмстоп“ придонесе за огромно зголемување на нивната вредност, принудувајќи ги хеџ-фондовите да се обидат да ги купат по многу повисока цена, така остварувајќи големи загуби наместо профит.

„Мелвил“, на пример, ја почнал годината со фонд од 12,5 милијарди долари, а сега располага со 8 милијарди, од кои 2,75 се во посед на нивни партнери.

Големи загуби претрпел фондот „Мејплејн капитал“, кој годината ја почнал со 3,5 милијарди долари, но во јануари претрпел загуби од 45 отсто.

За да ја минимизираат загубата, големите хеџ-фондови веќе престанале да тргуваат со акциите, што не значи дека и понатаму вештачки ќе се крева вредноста на „Гејмстоп“ и на други компании за кои се намножиле „облози“ дека ќе пропаднат, како „Еј ем си ентертејмент холдингс“ и „Блекбери“.
Поради големиот потрес на Волстрит, за случајот се заинтересираа и внимателно го следат Белата куќа и финансиските институции. Регулаторот во Масачусетс, Вилијам Галвин, се заложи за едномесечно замрзнување на тргувањето со акции на „Гејмстоп“ на њујоршката берза, очекувајќи дека „тоа ќе ги повреди малите и несофистицирани инвеститори“.

Комисијата за хартии од вредност и тргувања на берзите на САД (СЕК) соопшти дека „внимателно ги набљудува чекорите преземени од компании кои се под регулација, а кои можат да ги измамат инвеститорите или на друг нчин да ја спречат нивната можност да тргуваат со одредени хартии од вредност“.

СЕК изрази готовност да ги заштитат малите инвеститори од „манипулативни или нападни“ трговски активности, забранети со сојузните закони за хартии од вредност. Апликациите како „Робинхуд“ и „Интерактив брокерс“, кои на индивидуални лица им овозможуваат бесплатно и лесно тргување со акции, поради преоптовареност привремено ги прекинаа услугите, но воедно настојуваат да ја зголемат сопствената вредност, барајќи свежи инвестиции. Како причина за привременото ограничување, „Робинхуд“ наведе и „проверка дали се почитуваат финансиските закони“ и „обврските кон Комисијата за хартии од вредност и тргувања на берзите“.

Експертите се убедени дека во секој момент може да „прсне балонот“ од надуената вредност на акциите на „Гејмстоп“ и сличните компании, што ќе значи дека некои играчи во овој краток период ќе заработат милиони, а други ќе банкротираат. Последиците ќе бидат глобални, бидејќи „доминото“ го почнале млади инвеститори аматери во САД, но сега акции на „Гејмстоп“, „Еј-ем-си ентертејмент“ и „Блекбери“ масовно се купуваат од Обединетото Кралство, Бразил и Малезија.