По празникот Рамазан Бајрам, лидерот на ДУИ Али Ахмети најверојатно ќе ги разреши фракционерите од „огнената група“ од партиските функции, дознава „Слободен печат“. По одлуката на „огнените“ за фракционерско дејствување во ДУИ, откако на Централното претседателство на партијата во минатиот викенд не најдоа заеднички јазик со „ахметистите“, допрва ќе ескалира политичката војна меѓу „интегративците“. Фракционерите, пак, деновиве, на прес-конференција ќе го обелоденат лидерот на фракцијата, логото и организациската поставеност.

Како порака дека фракционерите нема да може да ги задржат високите партиски функции и дека ДУИ може да дејствува и без нив, Ахмети неодамна го свикал Надзорниот одбор без консултација и присуство на претседателот на Надзорниот, Муса Џафери. Овој потег на Ахмети, „ахметистите“ го лиферуваа како потврда дека Џафери е веќе разрешен. Џафери, пак, за „Слободен печат“ негира дека повеќе не е претседател на Надзорниот одбор. Засега, како што вели тој, никој не го информирал, ни писмено ни усно, дека повеќе не е на таа функција.

Ахмети најверојатно ќе ги разреши сите фракционери од партиските функции. Ова ќе значи дека и Изет Меџити повеќе нема да биде потпретседател на ДУИ, градоначалникот на Сарај, Блерим Беџети, ќе биде тргнат од функцијата организациски секретар, а чаирскиот градоначалник Висар Ганиу и Невзат Бејта ќе бидат отстранети од Централното претседателство.

„Огнените“ не се изненадени од најавите дека им се подготвува смена од партиските функции. Велат дека тие се ДУИ и дека ќе продолжат да дејствуваат како фракција во рамките на партијата. Оттаму велат дека ќе коментираат ако и откако ќе бидат разрешени од функциите. Тие дури го предизвикуваат двоецот Ахмети и Артан Груби конечно „да бидат мажи“ и да пресечат дали ќе ги тргнат од функциите и дали ќе ги исклучат од партијата наместо секојдневно да лиферуваат закани за нивно разрешување и исклучување.

Паралелно со најавите дека Ахмети ќе расчисти со „огнените“, фракционерите ја подготвуваат структурата на фракцијата. Новото име за фракцијата е поради тоа што „огнената група“, како што досега беше препознатлива во јавноста, е име што им го дал лидерот Ахмети. Освен ново име, фракцијата ќе има и лого различно од тоа на ДУИ, а ќе има претседател и органи на фракцијата. Иако вака замислена фракцијата би функционирала како засебен политички субјект, „огнените“. како што велат барем засега немаат намера да ја напуштат ДУИ, односно и натаму ќе дејствуваат заради демократизација на партијата.

Засега никој не сака да прогнозира дали расплетот меѓу „огнените“ и „ахметистите“ ќе го дочека Конгресот на ДУИ кој треба да се одржи кон крајот на годинава и дали можен исход од незадоволството е и официјализација на фракционерското дејствување во ДУИ или, пак, разврската ќе биде многу поскоро, односно по евентуалното разрешување на „огнените“ од партиските функции.

Ахмети по состанокот на Централното претседателство децидно изјави дека во ДУИ не е дозволено фракционерство.

„ДУИ е партија што почитува вредности и почитува демократија. Што се однесува до фракционерството, јас таков предлог имав, го дадов на партиски конгрес, меѓутоа, изгубив на гласање од мнозинството. Јас како демократ почитувам став на мнозинството и не ги напуштам институциите. Според тие одлуки на Конгресот и Статутот на партијата, во ДУИ не се дозволува функционирање во фракции. Треба да се почека до следниот Конгрес, јас ќе  поддржам таков став за фракционерско делување“, изјави тогаш Ахмети.

„Огнените“, револтирани дека на состанокот на ЦП Груби усно реферирал за отчетот на министрите, што според незадоволните е враќање на процесот под нулта точка, демонстративно го напуштиле состанокот и објавија дека ќе дејствуваат како фракција. Тогаш тие посочија дека имаат огромни и организациски и програмски разлики, дека нема можност за дебата и дека министрите ја узурпирале партијата. „Огнените“ повторуваат дека повеќе не го препознаваат Ахмети и го потсетуваат лидерот дека тој лично повеќепати го прекршил Статутот на партијата.

„Како Ахмети дојде на власт, преку почитување на Статут, Устав и закони? Дали го почитуваше Статутот кога ја пласираа „Зелената агенда“ или „Отворен Балкан“, за кои не расправаа партиските органи? Дали по Статут е назначувањето на Бујар Османи и Рафиз Алити за политички координатори за ограноците на Чаир и Сарај? Ако одиме по Статут, да одиме докрај и да разјасниме колкупати е тој прекршен“, велат од „огнените“.