Паралелно со трката на лидерот на ВМРО-ДПМНЕ Христијан Мицкоски до конститутивната седница на парламентот да обезбеди двотретинско мнозинство, за која, како што самиот изјави, веќе имаат апсолутно мнозинство, собраниски извори за „Слободен печат“ брифираат дека конституирањето на новиот собраниски состав и изборот на нов спикер е планирано за идниот понеделник, односно 27 мај, еден ден пред истекот на крајниот рок до кога актуелниот претседател на парламентот Јован Митрески треба да ја свика седницата.

Очекувањата се дека конститутивната седница е можно да заврши за еден наместо за три дена, како што предвидува собранискиот Деловник.

Со седницата најверојатно ќе претседава пратеничката од коалицијата „Вреди“ Мерита Колчи Коџаџику, која во новиот собраниски состав е највозрасна. Таа е една година повозрасна од лидерот и пратеник на ДУИ, Али Ахмети, и од Љупчо Димовски од Социјалистичка партија. Ако Коџаџику одбие, со седницата ќе треба да претседава Ахмети, а ако одбие и тој, тогаш Димовски итн. Редоследно, му се нуди на наредниот најстар избран пратеник, сѐ додека некој се согласи да претседава со седницата.

Конститутивната може да биде на 28 мај само ако до 27 мај не може да се запазат роковите за прегласување на избирачките места што, пак, ќе зависи од одлуката на Управниот суд дали ќе ги прифати или отфрли жалбите на Европскиот фронт и ако симулацијата на Државната изборна комисија (ДИК) покаже дека оспорените седум гласачки места влијаат на резултатот од изборите.

По првата средба на работните групи на ВМРО-ДПМНЕ и на „Вреди“ за состав на новата влада и по изјавата на Мицкоски дека веќе обезбедил 61 пратеник, партиите неофицијално лицитираат со имиња на пратеничката тројка која ја сменила страната, односно од коалицијата предводена од СДСМ и од Европскиот фронт преминале во владејачкиот табор.
Мицкоски изјави дека три пратеника се приклучиле кон нивната коалиција и сега имаат 61 пратеник. Тој не обелодени кои се тие, но рече дека многу скоро ќе се знае.

– ВМРО-ДПМНЕ и коалицијата „Твоја Македонија“ ги заврши разговорите со неколку од пратениците кои не се дел од коалицијата и можам да кажам дека во моментов успешно консолидиравме 61 пратеник. Не можам да зборувам во однос на деталите, но многу скоро од денеска ќе ги дознаете деталите имајќи предвид дека состојбата е чувствителна. Со задоволство можам да кажам дека имаме консолидирано точно 61 пратеник, но тоа нема да нè повлече од разговорите со идните потенцијални коалициски партнери, како што е коалицијата „Вреди“ – кажа Мицкоски.

Тој е оптимист дека ќе обезбедат и двотретинско мнозинство со „Вреди“ и најверојатно со ЗНАМ на Максим Димитриевски.
Изет Меџити од „Вреди“, пак, рече дека со ВМРО-ДПМНЕ преговараат со четири пратеника од Европскиот фронт за тие да преминат на нивна страна.
Паралелно со преговорите, ВМРО-ДПМНЕ и „Вреди“ го чекаат исходот од одлуката на Управен суд и на ДИК за прегласувањето, од кое е можно да добијат по еден пратеник повеќе.
Партиите на големо лиферуваат информации дека меѓу пратениците кои ќе ја сменат страната се Бејџан Илјаз и Сали Мурати, како и Мендух Тачи и пратеничка од ДПА Фатмире Исаки, доколку воопшто во „шестката“, по евентуално прегласување, го задржи мандатот. И за ЛДП се шпекулира дека можно е да ја напушти коалицијата на СДСМ.
И двајцата споменати за евентуален „трансфер“, Бејџан Илјаз и Сали Мурати, во изјава за „Слободен печат“ демантираат дека ќе преминат во владејачката коалиција. Напротив, Илјаз вели дека Европскиот фронт може да разговара со ВМРО-ДПМНЕ за влез во влада. Од Тачи не успеавме да добиеме став. И Горан Мисовски од НСДП повторно демантира дека тој и неговата сопартијка Соња Мираковска ќе преминат во владејачката коалиција.
Лидерот на ДУИ Али Ахмети во прилог на тврдењата дека никој нема да го напушти Европскиот фронт објави фотографија на која се речиси сите лидери на коалициските партнери.

Според информации од „Вреди“, со ВМРО-ДПМНЕ ги утврдиле начелата на владеењето, а во тек е усогласувањето на владината програма. Идната недела ќе се делат ресорите.

Ова го потврди и Арбен Таравари кој рече дека владее позитивна атмосфера помеѓу работните групи на „Вреди“ и ВМРО-ДПМНЕ.

– Се надевам дека до крајот на идната недела ќе имаме завршен договор со програма на владата и со распределба на ресори, односно кој и каде ќе биде како министер. Ние како претседатели на партии сме имале две средби, понатаму интензивно работат работните групи, се надевам до понеделник ќе излеземе со заедничка програма, а до петок ќе имаме завршен договор меѓу „Вреди“ и ВМРО-ДПМНЕ, практично договор за нова влада – изјави Таравари.

„Вреди“ останува на позицијата дека го бараат претседателското столче во Собранието, зашто, како што велат тие, се легитимни претставници на Албанците и дека ако аргумент на ВМРО-ДПМНЕ е дека располага со 58 или 61 мандат, нивен аргумент е дека партијата на Мицкоски веќе има претседател на државата и иден премиер, така што претседател на Собранието треба да биде Албанец.
Како што веќе објавивме, ако ВМРО-ДПМНЕ го отстапи спикерското место, најсериозен кандидат за претседател на парламентот е Африм Гаши. „Вреди“ бара и вицепремиер за политички систем и уште четири или пет министерства.