Американската амбасадорка во земјава, Анџела Агелер денеска изјави дека таа нема конкретни сознанија за евентуално руско влијание во претстојниот изборен процес, иако, како што рече, тоа генерално е присутно во регионот, но напомена дека најважно за граѓаните за претстојните избори е добро да се едуцираат за процесот и за кандидатите, кои ќе учествуваат во него.

Агелер ова го кажа одговарајќи на новинарско прашање дали има информации за евентуално руско влијание на претстојните избори, на настанот на кој заедно со министерот за образование и наука Јетон Шаќири потпишаа меморандумот за спроведување на Фулбрајт програмата за академска размена.

– Не сум свесна за некое експлицитно и специфично влијание, како што кажавте. Генерално го има во регионот, но мислам дека она што е најважно е дека како што се движиме кон овој изборен период, граѓаните на оваа земја треба да поставуваат прашања за кандидатите и да ги земат предвид нивните приоритети, кога ќе гласаат. Тоа за мене е најважно и секако да се едуцираат себе си за процесот и за кандидатите, без разлика кој би можел да се меша, тоа е најважната алатка која ја имаат, истакна Агелер.

ВИДЕО | Груби: Предизвиците со кои се соочи државата се поттикнати од руски влијанија

Првиот вицепремиер и министер за политички систем меѓу заедниците Артан Груби во обраќањето на конференцијата „Година на европски можности“ ја обвини Русија за безбедносната, енергетската, ценовната криза и инфлацијата. Груби посочи дека многуте предизвици со кои се соочила државата имаат само еден единствен фактор на поттикнување а тоа е Русија. Според него, руските елементи и експоненти прават се за да им наштетат на прогресивните сили во Македонија и да го нарушат единството.

Според премиерот Димитар Ковачевски изјавата на Груби е конкретна, а Русија е посочена во делот на стратешките одлуки и процеси кои се правеле и прават во Македонија и дека Русија секогаш била против.

И тоа се факти коишто сите ги знаат, изјави Ковачевски.

Ковачевски, одговарајќи на новинарски прашања по отворањето на дводневната годишна конференција „Година на европски можности“ во Скопје, изјави дека станува збор за факти и оти вицепремиерот точно посочил за кои процеси мисли.

Прво, вицепремиерот Артан Груби беше многу конкретен и посочи кон Русија во однос на стратешките одлуки и процеси коишто се правеле и прават во државата и дека Русија секогаш била против. И тоа се факти коишто сите ги знаат. Тој не кажа дека за сè, туку точно посочи за кои процеси мисли, се мисли на зачленувањето во НАТО, на унапредувањето на демократијата како и на отпочнувањето на преговорите со ЕУ, додаде Ковачевски.

Овие избори, како што посочи Ковачевски нема да бидат избори помеѓу левица и десница, овие избори ќе бидат помеѓу Запад и Исток.

Такви ќе бидат изборите во 2024 година. Бидејќи обично во светот станува збор за избори каде што имате политички партии од центар, и лево од центар, како и политички партии од центар и десно од центар, кај нас сега ќе бидат избори на кои ќе се соочат политички партии што се за западна ориентација на државата и политички партии што се за јасна источна ориентација на државата. Затоа сметам дека нашата коалиција ќе ги има сите политички партии што денес се дел од оваа проевропска коалиција, од оваа прогресивна коалиција, а граѓаните многу јасно укажуваат преку сите анкети дека се за европска интеграција на државата, заклучи тој.