Во период од јануари до септември годинава, на Меѓународниот Аеродром Скопје и Аеродромот Св. Апостол Павле Охрид забележан е пораст од 30 отсто на патничкиот сообраќај, во споредба со минатата година и пораст од 15 проценти во однос на 2019 година. Во овоj период на двата аеродроми патувале вкупно 2,4 милиони патници.

Топ 5 земји со директни летови за јануари – септември 2023 година биле Германија, Турција, Швајцарија, Шведска  и Италија .

Во однос на бројот на летови за истиот период, годишниот пораст е 19, односно 5 отсто, споредено со 2022 и 2019 година, соодветно, или на аеродромите во Скопје и Охрид се реализирани и опслужени вкупно 17.683 летови.

-Ние како ТАВ, навистина сме среќни што забележуваме зголемување на бројот на патници за 30 проценти за аеродромите во Скопје и Охрид во споредба со статистиката од 2022 година. Посебно ни е драго што за само 9 месеци од 2023 година, со 2,4 милиони патници, речиси го достигнавме бројот на опслужени патници во целата 2022 година. Ова претставува продолжување на позитивниот тренд на закрепнување, а она што нè прави особено горди е што статистиката на воздушниот сообраќај за двата македонски аеродроми не само што ја надминува референтната 2019 година за 15 отсто, туку ги надминува прогнозите на ACI за обем на патници на глобално ниво во 2023 година, што е 94,2% од нивото од 2019 година. Очекуваме до крајот на оваа година, со новите линии и новите авиокомпании кои влегоа на македонскиот пазар, заедно со извонредноста во нашите услуги што ги даваат нашите посветени и ориентирани кон клиентите колеги, ќе ја заокружиме 2023 година како година на рушење нови рекорди – изјави Неџат Курт, генерален директор на ТАВ Македонија.

Во 2023 година, досега, две нови авиокомпании влегоа на македонскиот авијациски пазар, Lufthansa и Norwegian, со редовни или сезонски летови до Франкфурт, односно Осло.

Во меѓувреме, од скопскиот аеродром SunExpress најави дека чартер летовите до Измир и Анталија ќе продолжат да сообраќаат како редовни летови од претстојната зимска сезона, а Wizz Air започна со редовни летови до Љубљана. Дополнително, AEGEAN, од 2 октомври 2023 година започна да лета до Сараево.

Охридскиот аеродром имаше одлична летна сезона засилена со сезонските и чартер летови до Белград, на Air Serbia и до Манчестер и Лондон (Гетвик), на TUI.

Најчести дестинации од Меѓународниот Аеродром Скопје, според статистиката на патничкиот сообраќај на ТАВ Македонија, за периодот јануари – септември 2023 година, биле Истанбул (двата аеродрома, IGA и Sabiha Gokcen со 10,8% пазарен удел), Базел Милуз (6,1%), Цирих (5,5%), Виена (4,7%), Дортмунд (4,5%), потоа Франкфурт (4,2%), Минхен Меминген (4,1%), Анталија (4%), Малме (2,6%) и Келн (2,6%).

Топ 5 земји со директни летови за јануари – септември 2023 година беа Германија (27,3% удел на пазарот); Турција (16,9%); Швајцарија (13,4%); Шведска (6,7%); и Италија (6,5%).

Што се однесува до учеството на авиокомпаниите во патничкиот сообраќај за првите девет месеци од 2023 година на скопскиот аеродром, Wizz Air превезе најголем број патници (60,2% удел на пазарот), потоа Turkish Airlines (7,4%), Pegasus Airlines (6,1%), Austrian Airlines (4,7%), Chair Airlines (3,7%).

Најчеста дестинација за патување за трите квартали од 2023 година, јануари – септември, од охридскиот аеродром е Базел (21,5% удел на пазарот), потоа Виена (21%), Дортмунд (16,4%), Меминген (11,9%), Малме (9,4%), Цирих (9,3%), Амстердам (8,8%), а останатите дестинации имаат 0,5%.

Во моментов, според распоредот на летови, од Меѓународниот Аеродром Скопје летаат 14 авиокомпании до 41 дестинација, додека на Аеродромот Св. Апостол Павле Охрид, 2 авиокомпании летаат до 6 дестинации.