Адвокатот Јовица Страшевски, кој е бранител на Љупчо Палевски, обвинет за убиствата на Вања Ѓорчевска и Панче Жежовски, инсистира на тоа дека не постојат докази дека неговиот клиент ги убил жртвите. Тој вели и дека Велибор Манев, кој го посочи Палевски како ладнокрвен извршител на убиствата, направил кривично дело со давање лажен исказ пред судот.

„Многупати сум го провоцирал Палевски, но тој ми тврди дека убиствата на Вања и Панче не ги извршил. ‘Нема докази и ќе се борам до крај за жена ми и ќерка ми и за фамилијата’, вели тој“ рече Страшевски во „Претрес со Ландов“, додавајќи дека не може вината да ја насочи кон никого.

Палевски, од своја страна, преку писмо го обвинува Велибор Манев дека е убиецот.

Адвокатот Страшевски вели дека е можно да имало недоразбирања меѓу Велибор и Палевски, но не е докажано дека пиштолот е на Боре Видевски, исчезната е ташничката со пиштолот на Видевски од Велес до Скопје – пиштолот го нема.

„Ако има еден доказ дека Палевски ги убил Вања и Панче, ќе се повлечам и ќе ѝ се извинам на јавноста“, рече адвокатот.

Страшевски во интервјуто рече и дека тој се нафатил да го брани Палевски, иако на почетокот, како и многу адвокати, одбил да го застапува.
Тој прво тврдеше дека ќе го брани клиентот про боно, за потоа да рече дека доколку ја добие постапката, „ќе си наплати“. Адвокатот негира дека ќе биде исплатен во форма на автомобил или стан од партијата Десна.

„Партијата Десна не ми треба, јас сум горд член на ВМРО-ДПМНЕ“, рече Страшевски.