Адвокатот на Љупчо Палевски, Јовица Страшевски побара ослободување на неговиот клиент, бидејќи, како што рече во своите завршни зборови пред судот, обвинителството не можело да докаже дека Палчо ги сторил убиствата на Вања и Панче. Според Страшевски, обвинителството уште 10 години да се труди нема да докаже.

„Предлагам обвинитетиот Љупчо Палевски да се ослободи од вина, оти според обвинителниот акт не е јасно какви дејствија преземал. Околу целата постапка ниту преземал одредени дејствија кои му се ставаат на товар со другите обвинетите, а ниту поттикнал, ниту наведувал другите обвинети да сторат нешто. Иако истрагата не беше почната, пресудата беше донесена, а медиумите истото го пренесуваа без пресумпција на невиност. Јавноста креираше јавно мислење со предвремена пресуда за обвинетиот. Обвинителството не докажа ниту разумно сомневање, ниту го докажа тоа што му го става на товар на Љупчо Палевски. Обвинителството уште 10 години да се труди да ги докажува нивните тези, нема да ги докаже. Затоа што на сите им стана јасно дека Палевски не ги сторил убиствата“, рече Јовица Страшевски во завршниот збор.

Тој нагласи дека Палевски е обвинет со обвинителен акт со само 17 докази, но, дека нема ниту еден конкретен доказ кој ја докажува неговата вина.

„Докази во овој судски процес не постојат“, рече Страшевски, кој презентираше снимки на кои се гледаат Велибор Манев и Боре Видевски.

„Се поставува прашањето зошто е убиена Вања, а не Миња, ќе додадам. Обвинителството не докажа зошто е грабнато девојчето. Често бев прашуван зошто киднаперите се одлучиле да ја грабнат Вања, или биле во план двете девојчиња? Одговор не добивме ниту од полицијата, ниту од обвинителството. Дали Кешишев тргнал со полиција да го откопува телото на Вања и дали притоа свесно биле уништени голем број докази?“, праша Страшевски.

Тој додаде дека уште на првата прес-конференција била нарушена пресумпцијата на невиност. Во врска со обвинителството дека Палевски нема алиби, Страшевски рече дека на Палевски не му треба алиби, затоа што обвинителството нема докази против него.