Адмирал на НАТО денеска ги повика бизнисмените да подготват „воено сценарио“ и да го прилагодат своето производство и дистрибуција за да бидат што помалку изложени на „руска и кинеска уцена“.

„Ако можеме да ги обезбедиме сите производи и услуги, тоа е клучен дел од нашето одвраќање“, рече во Брисел шефот на воениот одбор на НАТО, холандскиот адмирал Роб Бауер.

Говорејќи на конференцијата на аналитичкиот центар за европски политики, тој рече дека одвраќањето вклучува повеќе од само воени способности, бидејќи во услови на војна се користат сите достапни инструменти.

„Сведоци сме на се повеќе саботажи и Европа веќе го доживеа тоа во снабдувањето со енергија“, рече Бауер.

„Мислевме дека имаме договор со Гаспром, но всушност имавме договор со г-дин Путин. Истото важи и за кинеската инфраструктура и производи. Ние всушност имавме договор со господинот Сји“, додаде тој.