Кога државниот ревизор влегол на Клиниката за онкологија и забележал дека материјалната и сметководствената евиденција не се усогласени, односно дека нема знак на равенство меѓу нив, Клиниката немала објаснување зошто е тоа така. Главниот државен ревизор Максим Ацевски на денешната седница на Комисијата за финансирање и буџет во Собранието кажа дека Клиниката согласно законот не би смеела да набавува биолошка терапија над одобрениот буџет од страна на Фондот, но тоа сепак се случувало.

-Но, во услови на детални правила на постапување и со можност на монополско одлучување на поединци, има сомнеж од злоупотребан а таквата терапија. Дали завршила во Косово не е предмет на истражување на ревизорот бидејќи немаме алатки како да го утврдиме тоа. Имаме други надлежни органи кои треба да испитаат врз основа на медицинската документација како одредена историја на болести, дали завршила одредена биолошка терапија во Косово, изјави Ацевски.

Тој додаде дека секогаш ќе се залага да се издвојуваат повисоки суми од буџетот за биолошка терапија, но тоа да биде поткрепено со мислење на стручниот колегиум.

-Ирелевантно е дали ќе утврдите политичка одговорност на поединци, ако граѓанинот на кого му е потребна биолошката терапија не ја добие, рече Ацевски и додаде дека Министерството за здравство не ги чита ревизорските извештаи.

-Министерот не е ангел да знае се, но неговите соработници требало да знаат, додаде ревизорот.

Пратеничката Благица Ласовска кажа дека од пратениците се очекува системска промена и го праша ревизорот како Клиниката за онкологија го оправдала недостигот на терапијата пред ревизорот, односно тоа што имало неусогласување меѓу материјалната и сметководствената евиденција.

-Кога имате нееднаквост меѓу материјалната и сметководствената евиденција, мора да објасните и каде се тие лекови, рече Ласовска и додаде дека „не ѝ е јасно зошто системот КАТО не се враќа во употреба туку се промовира можноста да се воведе сосема нов систем“.

-Зошто нов? За да земат повеќе пари? Колку им е доста на овие луѓе не ми е јасно, рече Ласовска.

Ревизорот одговори дека документи за правдање на ваквата состојба – немало.

-Ако имало документи да ги покријат состојбите, немаше да имаме таква утврдена состојба. Има разлика меѓу сметководствената и материјалната евиденција на почетокот и на крајот на годината што е ризик за злоупотреба на лековите. Не се презентирани образложенија за таквата разлика, рече Ацевски.