Алијанса за Албанците (AA) реагираше по одлуката на Врховниот суд да ја отфрли како неоснована тужбата за клевета на Али Ахмети и Муса Џафери против Слободан Богоевски во врска со неговото сведочење во случајот „Мaџар Телеком“.

Од оваа партија велат дека и покрај одлуката на Врховниот суд, сепак сметаат дека судовите во земјава се политизирани.

– Потсетуваме дека обвиненијата за клевета беа директно засновани на сведочењето на Богоевски во њујоршкиот суд, што значи дека судот го ослободи Богоевски и ги отфрли наводите на двајцата обвинети Ахмети и Џафери. Остануваме на ставот дека судовите во земјава се политизирани, но овој пат пред нив ја имаат американската правда. Од оваа правда нема да можете да избегате, а покрај корумпираните политичари, наскоро ќе одговараат и оние судии и обвинители кои ги влечеле, криеле и амнестирале нивните криминали. Деновиве заменик-помошникот државен секретар за Јужна и Централна Европа, Габриел Ескобар предупреди дека американската црна листа ќе биде дополнета со други политички имиња од балканските земји. Бидете уверени дека ниту судиите и обвинителите на Сваровски, ниту Луис Витон нема да можат да ја избегнат оваа правда, изјави Наим Бајрами од Алијансата за Албанците.

Врховниот суд ја отфрли тужбата за клевета на Ахмети и Џафери против Слободан Богоевски