Европските лидери разгледуваат иницијатива за воспоставување тампон зона длабока околу 40 километри помеѓу позициите на украинските и руските сили, објави Политико.

Идејата е претставена како една од опциите во рамките на иден мировен договор или евентуален прекин на огнот, но веќе предизвика сериозни поделби во НАТО и меѓу европските сојузници.

Москва истовремено ги објави своите планови за создавање слични безбедносни зони по должината на границата, додека во Киев оваа иницијатива се перцепира како обид за консолидирање на руската контрола врз окупираните територии. Украинските власти ја отфрлаат можноста да се согласат со ваквите предлози, сметајќи ги за територијална отстапка.

Според изворите на Политико, за патролирање би биле потребни помеѓу 4.000 и 60.000 војници, а Велика Британија и Франција најактивно ја промовираат иницијативата. Полска и Германија одбија да учествуваат, плашејќи се дека нивното вклучување ќе го ослаби источниот крило на алијансата, додека Естонија изрази подготвеност да распореди дел од своите сили. Во рамките на НАТО, останува прашањето дали контингентите би имале исклучиво патролна улога или би биле вклучени и во обука на украински војници.

Соединетите Американски Држави заземаат претпазлив став. Пентагон веќе ги информираше европските сојузници дека американските војници нема да бидат испратени во Украина и дека Вашингтон е подготвен да се ограничи на обезбедување сателитски надзор и разузнавачка поддршка.

Неколку експерти предупредуваат дека таков потег би можел да има спротивен ефект.

Поранешниот заменик-помошник секретар за одбрана на САД за Европа и НАТО, Џим Таунсенд, оцени дека ова е „фаќање за сламки“, нагласувајќи дека неколку европски набљудувачи не би можеле да претставуваат сериозно одвраќање за Москва. Полските претставници дополнително стравуваат дека повлекувањето на трупите во тампон-зоната би ја загрозило безбедноста на нивната територија.

Иницијативата во моментов е предмет на неформални дискусии и не е на официјалната агенда на состаноците на НАТО. Прашањата за големината, составот и правилата за ангажирање на контингентот остануваат отворени, а сојузниците чекаат Вашингтон појасно да го дефинира обемот на своето учество.