Црвениот крст денеска одбележа 78 години од основањето, а се одржа и донаторска акција за собирање на помош за настраданите подрачја од катастрофалните земјотреси во Турција и Сирија. На настанот беа присутни премиерот Димитар Ковачевски, министри, пратеници, претставници на дипломатскиот кор, претставници на меѓународни организации, претставници на локалната самоуправа, претставници на компании, како и поддржувачи на Црвениот крст.

Целта на денешната акција беше да се обезбедат еден милион евра, а таа беше постигната, со што се заокружи хуманитарната помош за двете држави.

Седумдесет и осум години хуманитарност, солидарност, пожртвуваност, издржливост, ублажување на страдањето на луѓето и пружање рака секаде и секому. А, со истото несебично залагање за овие трајни вредности, посакувам Црвениот крст да продолжи уште многу, многу години, порача премиерот Ковачевски во своето обраќање.

Информираше дека Владата донела одлука за одобрување на буџетските средства за 2022 година, во износ од над 243.000 евра, како финансиска помош за делување при итни состојби. Оваа година донесена е одлука за финансирање на Годишната програма на Црвениот Крст на Република Северна Македонија, во висина од околу 98.000 евра и средства во висина од над 32.000 евра за реализација на Проект за одмор и рекреација на деца од семејства со социјален ризик и деца корисници на посебен додаток за летен распуст 2023 година.

Упати повик до граѓаните да се вклучат во денешната донаторска акција и да им помогнат на настраданите подрачја од земјотресите.

Генералниот секретар на Црвениот Крст на Република Северна Македонија, Саит Саити потенцираше дека денес несомнено работата на Црвениот Крст е порелевантна и попотребна од кога било,

Светот денес потсетува на брод кој плови по немирно море, со многу нееднаквости, експлоатирање, омаловажување, застрашување, војни, природни катастрофи и миграции на луѓе како резултат на економски, политички, социјални и климатски состојби. Основна причина која ги означува сите овие состојби е недостаток на хуманост и почит, вели Саити во обраќањето.

Се заблагодари на сите оние кои вложиле и ја поддржале организацијата и порача дека хуманоста и солидарност продолжуваат да бидат водилка и инспирација со цел да направат позитивна разлика во животот на луѓето.

Турскиот амбасадор, Хасан Мехмет Секизоќок во своето обраќање изрази благодарност за помошта

Обединети во едно срце, јавните институции, невладиниот сектор, бизнис заедницата, образовните институции, млади и возразни, сите помагаа за настраданите од погодените региони. Не може да ги вратиме назад изгубените животи…Но, со сета можна сила ќе работиме за закрепнување на раните на оваа природна катастрофа. Одново ќе ги изградиме разурнатите градови и училишта. Вие ја споделивте нашата голема тага. Вие, во Вашата моќна солидарност, воедно ја споделувате и надежта на турскиот народ за обновата на погодените региони. Турскиот народ со благодарност ќе се сеќева на Вашата љубов и солидарност, порача амбасадорот.

Црвениот крст е основан на 17 март 1945 година. Признат е како на национално друштво на Црвен крст од Меѓународниот комитет на Црвениот крст на 01.11.1995 а на 27 ноември 1995 година станува полноправен член на Меѓународната федерација на националните друштва на Црвениот крст и Црвената полумесечина, како 169 членка на Меѓународното движење.

Мисијата на Црвен крст е да го спречи и ублажи човековото страдање, заштита на животот и здравјето, унапредување на социјалната состојба, обезбедувајќи почит и достоинство за човековото битие, а особено во случај на несреќи и катастрофи, го промовира меѓународното хуманитарно право и хуманите вредности, поттикнува доброволно ангажирање и постојана подготвеност за давање помош, како и универзално чувство за солидарност и хуманост.