Церемонијата на која легендата на Лос Анџелес лејкерс, Коби Брајант требаше да биде примен во „Куќата на славните” во Спрингфилд е одложена за наредната година. Ова е официјално потврдено на веб-страницата на лигата.

Церемонијата првично беше предвидена за 29-31 август во Спрингфилд,а покрај Коби, најзвучни имиња кои требаше да бидат примени оваа година во Куќата на славните се Кевин Гарнет и Тим Данкан.

– Ја откажуваме церемонијата“, изјави Џери Коланџело, претседателот на „Куќата на славните“. „Ќе биде презакажана за првата четвртина од 2021 година. Во следните неколку недели ќе имаме состанок и ќе разговараме за потенцијалните датум и местото на одржување на церемонијата – изјави Џери Коланџело.

Брајант на 26 јунуари годинава трагично загина во хеликоптерска несреќа заедно со неговата 13-годишна ќерка и уште седум други патници.

Брајант целата своја кариера ја помина во Лос Анџелес лејкерс и во 20 сезони стана еден од најдобрите играчи во историјата на НБА лигата и притоа освои пет шампионски титули.

На 4 април беше објавено дека Брајант ќе биде вклучен во „Куќата на славните” постхумно и една година пред предвиденото. Според правилата, кошаркарите ја добиваат оваа чест не порано од пет години по завршувањето на кариерата. Играчот ги заврши настапите во 2016 година.