Министерот за здравство Азир Алиу денеска ја посети тетовската болница каде ги извести 155-те хонорарци дека е решен нивниот проблем со трајното вработување. Нагласи дека останува уште административното тестирање на вработените.

„Денес сме во Тетово токму за оваа работа – да поразговараме со 155-те вработени кои сега се дел од институцијата со полно работно време. Многу сме среќни што ќе бидат дел од здравствениот систем во Тетово, затоа што уште еднаш ќе нагласам, без соодветен обучен човечки капацитет, здравствените институции не можат да обезбедат навремени и квалитетни услуги за граѓаните“, изјави Алиу.

Тој рече дека за да биде компатибилна и да нуди услуги, една институција има три неопходни столба – едниот е инфраструктурен, вториот е организациски и третиот е човечкиот фактор, за кој, како што нагласи, веруваат дека е најважен, затоа и инвестираат во подобрување на капацитетот на здравствените институции.

„Задоволство ми е што токму првата средба ми беше тука со колегите, кои имаат еден од највиталните нерешени проблеми, а тоа е вработувањето. Некои од нив работеа и по 10 години, а други по месец или година, беа и без плата, за да бидат дел од институцијата“ рече Алиу.