Српскиот претседател Александар Вучиќ се сретна со специјалниот претставник на Европската унија Мирослав Лајчак каде разговарале за дијалогот меѓу Косово и Србија, пренесуваат регионалните медиуми.

Според медиумските написи од кабинетот на српскиот претседател, Вучиќ истакнале дека неговата земја е „секогаш подготвена за дијалог“ и за почитување на сѐ што е потпишано и договорено.

Вучиќ повторил дека српските власти се посветени на „деескалација, мир и стабилност“, кои се „неопходни за да се обезбеди опстанок на Србите на Косово“.

„Вучиќ детално го информираше специјалниот претставник на ЕУ за тежината на ситуацијата со која се соочуваат Србите, и северно и јужно од Ибар, изразувајќи надеж дека ќе се постигнат резултати во натамошниот процес на дијалог“, се вели во соопштението.

Вучиќ инсистирал на формирање на заедница на општини со српско мнозинство на северот на Косово, а се разговарало и за други важни теми во рамките на дијалогот меѓу Косово и Србија.