Вкупно 111 граѓани поминале низ лекарските прегледи на Клиниката за пулмологија по пожарот во Трубарево. Од нив, 11 луѓе ќе продолжат со прегледи на Клиниката за пулмологија, додека другите поминале без знаци за натамошен третман – ова вечерва го соопшти министерот за здравство, Азир Алиу.

Граѓаните кои се пратени на дополнителни пулмолошки испитувања се повозрасни луѓе, вели тој.

Алиу апелира сите граѓани кои имаат кашлица, главоболки, отежнато дишење,… да се пријават уште вечерва за скрининг.

-Скрингот проодлжува и утре од 10 до 16 часот, а ако е потребно ќе продолжи и понатаму зашто целта е да ги опфатиме сите граѓани кои мислат дека треба да поминат скриниг или ако чувствуваат некакви симптоми како кашлица, главоболки, отежнато дишење. Тие граѓани би ги замолил да се пријават уште вечерва. Добро е порано да се детектираат здравствените проблеми, за да ги третираме – истакна Алиу.

Според протоколот, скрининг треба да се направи уште двапати, по три и по шест месеци, за да се види ефектот од загадувањето по пожарот.