Владата на вчерашната седница не ја докомплетираше Комисијата за употреба на имиња, која има рок до утре да ги провери називите на сите 17.000 регистрирани здруженија и фондации во Македонија и за оние кои во имињата имаат личности поврзани со нацизам, геноцид, фашизам, Третиот рајх да  издаде мислење дека не се усогласени со законските измени на Законот за здруженија. Потоа министерот за правда требаше врз основа на тие мислења да издаде решенија за неусогласенст, а потоа Централниот регистрар да ги ликвидира здруженијата врз основа на решенијата од министерот.

Од Владата неофицијално велат дека Комисијата за имиња не е докомлетирана ниту на вчерашната седница и дека имаат став за настанатата ситуација, но официјалниот став се уште не е пристигнат до редакцијата на „Слободен печат“. Штом ќе пристигне, ќе го објавиме.

Петчлената Комисија за употреба на имиња, која е формирана врз основа на законските измени на Законот за здруженијата, само што се формираше, брзо се растури. Во текот на февруари прво од неа замина едниот член од МАНУ, оти по професија е уролог и не сака да учествува во работата на таква Комисија, а потоа замина и членот номниниран од Министерството за култура затоа што го напуштил работното место во Министерсвото. Оттогаш се очекуваше дека Владата ќе именува нови членови на предлог на МАНУ и Министерството за култира, но работата запна и до денес Комисијата не е дооформена.  Претходно сите здруженија добија рок од три месеци да се усогласат со законските измени, а потоа Комисијата во рок од еден месец требаше да провери дали сите се усогласени и оние кои не се, да бидат избришани во пропишаната постапка.

Извори од Комисијата „Слободен печат“ велат дека се очекуваше на вчерашната седница да бидат назначени новите два члена, за да можат денеска и евентуално сите петорица да заседаваат и да ги донесат потребните одлуки во предвдениот законски рок.

Од Владата се уште не испратија информација кога ќе се докомплетира Комисијата, на кој начин ќе работи, како ја врши проверката на личностите, дали за секое здружение ќе издава поединечно мислење или ќе издава мислење само за оние за кои ќе утврди дека не се усогласени со законските измени, како и што ќе се случува понатаму ако се пробие рокот 16 март. Законските измени со кои сите здруженија добија рок од три месеци да ги усогласат своите називи, беа донесени есеноска како резултат на силната реакција на македонските граѓани на сканалозните имиња на здруженијата на македонските Бугари, битолското „Иван Михајлов“ и охридското „Цар Борис“.