Сè поострите потези на администрацијата на Доналд Трамп ја туркаат кризата меѓу САД и Венецуела во поопасна фаза. Додека американската морнарица дејствува во Карипското Море и уништува бродови обвинети за трговија со дрога, Белата куќа го затвора и каналот на дипломатска комуникација со Каракас, чекор што аналитичарите го гледаат како можен вовед во отворена конфронтација.

Имено американскиот претседател Доналд Трамп ги суспендираше напорите за постигнување дипломатски договор со Венецуела, отворајќи го патот за можна воена ескалација, објави „Њујорк тајмс“, повикувајќи се на претставници на администрацијата на Трамп.

Од февруари 2025 година, специјалниот претставник Ричард Гренел водел разговори со претседателот Николас Мадуро и други високи функционери. Но, според извори на „Њујорк тајмс“, на состанок со военото раководство Трамп наредил прекин на сите дипломатски контакти, вклучително и на разговорите со Мадуро.

Американските претставници тврдат дека Белата куќа веќе има развиено повеќе воени сценарија. Трамп претходно јасно стави до знаење дека е подготвен да ги користи „сите инструменти на американската моќ“ за да го запре протокот на дрога од Венецуела.

Портпаролката Каролин Ливит на 6 октомври одби да потврди или да негира дали испраќањето на американски трупи во Венецуела е реална опција.

Закани со бомба во амбасадата на САД

Паралелно со политичко-воената ескалација, безбедносните тензии растат и на терен. Венецуелските власти ја засилија заштитата на амбасадата на САД во Каракас по добиена закана за бомбашки напад.

Претседателот на парламентот, Хорхе Родригез, соопшти дека зад заканата стојат „локални десничарски екстремистички групи“.

И американските власти и европските дипломатски мисии биле информирани за потенцијалниот напад.

„Ги зголемивме безбедносните мерки во овој дипломатски објект, кој нашата влада го почитува и го штити“, напиша Родригез.

Блумберг забележува дека терористичката закана се појавува токму во момент на длабока политичка поларизација и нарушени односи меѓу двете земји.

Полуразрушени дипломатски односи и патот кон војна

Од 2019 година, САД немаат дипломатско присуство во Венецуела, сите дипломати беа повлечени на барање на Каракас. Во август 2025 година, Трамп тајно потпиша директива до Пентагон за употреба на воена сила против латиноамериканските нарко-картели, по што САД распоредија седум бродови со 4.500 војници долж венецуелскиот брег.

Мадуро одговори со мобилизација на Боливарската национална милиција. Во следните месеци, американските сили спроведоа неколку ракетни напади врз венецуелски бродови, вклучително и на 3 октомври, кога беше уништен брод осомничен за транспорт на дрога. Истовремено, венецуелските радари открија најмалку пет американски борбени авиони во близина на брегот.

Ен-би-си Њуз, повикувајќи се на извори, објави дека американската војска веќе разработува сценарија за напади врз трговците со дрога во Венецуела, кои би можеле да се реализираат во рок од неколку недели — иако формална одлука сè уште нема.

Сценарио за Венецуела за да ја следи судбината на Иран

Брзата ескалација на потезите од страна на Вашингтон укажува дека политиката кон Венецуела влегува во нова, поагресивна фаза. Прекинот на дипломатските контакти, распоредувањето воени сили и сигналите за можна интервенција создаваат амбиент што потсетува на почеток на долготрајна конфронтација — слична на онаа со Иран по 2018 година.

Доколку Белата куќа навистина ја избере воената патека, САД би можеле да се соочат со комплексен конфликт во Латинска Америка, кој не само што ќе ја продлабочи изолацијата на Венецуела, туку и ќе го тестира меѓународниот легитимитет на американската надворешна политика. Од друга страна, продолжување на сегашната состојба без дипломатски канали го зголемува ризикот од недоразбирања, инциденти и брза милитаризација на кризата.

Во вакви услови, сценариото во кое Венецуела ја следи судбината на Иран со санкции, политичка изолација и постепено зголемување на воениот притисок станува сè поверојатно.