Зонското паркирање полека се шири и во населбите низ Скопје кои досега немале регулирање на сообраќајот во мирување. Воведено е во дел од Карпош, проширено уште на неколку улици во Аеродром, а од ЈП „Градски паркинг“ најавуваат дека ќе се воведува и на други локации.

Поради тоа, од претпријатието ги информираат граѓаните на кои сѐ начини можат да платат за паркирање во зона, па ги повикуваат освен најкористениот начин за наплата, со СМС пораки, да ги користат и останатите можности за плаќање.

За оние кои не знаат, паркирањето може да се плати и преку мобилната апликација Паркинг.Мк, која е достапна на сите андроид и ИОС оперативни системи.

Со инсталирање на апликацијата, добивате можност за едноставно и брзо плаќање. Потребно е да ги внесете податоците за регистрацијата на возилото и платежна картичка, а користејќи ја апликацијата, преку ГПС системот добивате можност за прецизно утврдување на локација т.е. зоната на паркирање. Исто така, апликацијата нуди можност за плаќање за паркинг услуга за повеќе возила истовремено –  објаснуваат од „Градски паркинг“.

Друг начин на наплата за зонско паркирање е преку QR код, кој го има на информативните табли, поставени на влез и излез од паркинг зоните, со чие скенирање потоа може да се внесе времетраењето на паркирањето, регистрација на возилото и платежна картичка.

За паркирање, како што велат од јавното претпријатие, може да се користат и „греб“ картичките, кои можат да се набават на одредени локации во близина на зоните за паркирање.

 Потребно е да ги изгребете: датумот, часот и минутите за паркирање и да ја поставите греб картичката на видно место во автомобилот, најдобро на предното ветробранско стакло, од внатрешна страна – посочуваат од Градски паркинг“.