Жители на Ново Лисиче реагираа преку социјалните мрежи дека локалната власт за само еден час ги собрала хаварисаните возила и ја исчистила околината каде што ќе се отвора маркетот „Лидл“ во Ново Лисиче поради присуството на премиерот Христијан Мицкоски на свеченото поставување на камен-темелникот.

Тие посочуваат дека со години бараат решавање на проблемите со хаварисани возила, смет и диви продавачи во тој дел од паркиралиштата, но, како што велат, општината немала волја да одговори на нивните барања.

„Со ова Општина Аеродром покажа дека приоритет ѝ се поединци и бизнис интереси, а не граѓаните од кои добива легитимитет“, се вели во Фејсбук-статусот на групата „Ново Лисиче“.

Новиот малопродажен објект на германската компанија „Лидл“ ќе се простира на 3.438 квадратни метри, од кои 1.200 квадратни метри ќе бидат продажен салон, а ќе има и 57 паркинг-места за посетителите.

На поставувањето на камен-темелникот присуствуваа премиерот Христијан Мицкоски, вицепремиерот и министер за транспорт Александар Николоски и градоначалникот на Аеродром, Дејан Митески.